Daxmeh go gig sang, mbouj biz mbouj reuq, gwnz najbyak de miz geij diuz nyaeuq iq, aennaj de ciengzseiz riu.

Daxmeh gou gig simndei. De ciengzseiz gyauyuz gou naeuz: Guh vunz aeu lauxsaed, doiq vunz aeu simndei.

Miz gienh saeh ndeu hawj gou lumz mbouj liux. Miz ngoenz ndeu, mbwn gig ndat, daengngoenz lumj aen giuzfeiz nei coemh gwnzdieg. Gou youq ndawfuengz sij cozyez, gou mienh sij mienh dawz beiz vad, hoeng gwnzndang lij hanh lae mboujdingz. Gou doiq daxmeh naeuz:“Daxmeh, dienheiq ndat ndaej yaek aeu mingh gou lo, gou siengj gwn sietdiuz.” Daxmeh naeuz:“Byaij, gou daiq mwngz bae cawx!”

Daengz dieg gai sietdiuz, gou leh aeu caet gaiq sietdiuz, daxmeh daj ndaw daehyaem dawz ok mbaw 50 maenz ngaenz ndeu ndenq hawj boux daxau gai sietdiuz haenx, daxau doiq liux ngaenz, gou caeuq daxmeh bibuengq dauqma ranz lo.

Ma daengz ranz, daxmeh dawz ngaenz okdaeuj yawj, de gag gangj gag naeuz:“Mbouj dwg ha! Yungh bae caet maenz, baenzlawz lij lw 45 maenz ne?” Gou gig angq, naeuz:“Daxmeh, daiq ndei lo! Daxau haenx doiq hawj mwngz lai song maenz lo, song maenz neix hawj gou yungh ba!” Daxmeh caengz gou da ndeu, fatheiq naeuz:“Song maenz neix gou wnggai soengq dauqbae hawj boux daxau haenx couh dwg, raeuz mbouj naengz dam’aeu gij cienz gip ndwi haenx! Caiq naeuz, vunz guh gaicawx mbouj yunzheih ha!” Gangj sat, daxmeh sikhaek buet ok dou bae, soengq song maenz ngaenz bae hawj daxau haenx lo.

Gienh saeh neix hawj gou mingzbeg: Guh vunz aeu daj saeh iq guh hwnj, mbouj naengz raen ngaenz da hai, guh vaihsaeh.

Gou gyae daxmeh gou, gou daj ndawsim fug de.

(指导老师：李金帅)