Seizcin daeuj lo, ndit menh- menh saj youq gwnzdieg, rumzcin raeujrubrub, liuxdiuz neuznetnet buengqfengfeng, doengh gomiuz hix ngauznged aen ndang gyaeundei gyoengqde……

Vaduj, cungj doxgaiq sam nyied neix, beij ndit engq cigciep、engq haenq, lumj gyoengq sau iq ngamq baenz sau yaek ra youx nei, caenx youq henz roen dinghcwd cajdeq, yawjmuengh duzngaeuz ndaw fangz- hwnz loq haenx.

Mwngz yawj: Duj he、song duj、cien duj、fanh duj……Gij yiengh- siengq yienghneix roxnaeuz yiengh- haenx, foenfoen mbehai gij saekcaij seizcin. Diuz loh iq raezrangrang haenx, deng raq dem raq varang cimq dwk. Gyaeuj nye dauqdaej caen dingj mbouj ndaej gij gyaeundei naekgywggywg haenx, haenqrengz dingj liux caiq dingj, doeklaeng mbouj ndaej mbouj gungj aenhwet roengz. Seizneix, douhongh yiengj nget sing ndeu, simjseiq ranz Vangz youzyed byaij okdaeuj. Naj de miz di launyaenq, neix mbouj couh dwg ndaw seizcin dujva ceiq launyaenq he ma?

Mwngz yawj: Geij duz mbungqmbaj dingj mbouj ndaej gij gyaeundei ciunyex, mbinfefe gvaq- daeuj. Youq gwnz duj neix mup mbat he, youh bae gwnz duj haenx cup mbat he, lij mbouj rox cihgeij yaek aeu duj lawz ndei, cijndei gvaengzgvax youq ndaw va, mbin bae mbin dauq, fouxyegyeg. Gij foux gyaeundei gyoengqde, rox dajhai aensim gyoengq vaduj lwi?

Mwngz dingq: Sing roeg heuh he daj ndaw va dek okdaeuj, roeghenj nyaenx mbouj ndaej hai bak ciengq go, cwxcaih dwk cieng gij go de gaenq cunjbei gig nanz haenx, singgo sekrwenz ndeidingq, beng hai gaiq baengzmuq seizcin lo.

(Yiz Li)