Ngoenzneix, gou yawj《Doxceng》bien donjvwnz neix le, rox aen dauhleix gig laeg ndeu：Bouxvunz aeu rox gvanhyungz. Siengj daengz gizneix, gou nyaenx mbouj ndaej siengj hwnj baez gou caeuq doengzhag doxceng haenx.

Geiq ndaej baezhaenx, lingz roengzdangz yiengj lo, gyoengq doengzhag cungj lumj duzrwi nei mbin okbae lo, gou dauq naengh youq ndaw gyausiz yawj govaisuh, seizneix Vangz Cunhgiuz youq ndaw gyausiz buet bae buet dauq, siengj mbouj daengz, de daemj aen hab vwnzgi gyaeundei gou doek roengz namh bae, vaih lo.

Gou ndatheiq raixcaix, lumj duz saeceij yakdoeg nei hongz de naeuz：“Mwngz yawj, mwngz daemj habvwnzgi gou vaih lo, ced meh mwngz, buet gijmaz？”Mizmbangj doengzhag dingqnyi le hix buet gvaqdaeuj, liujgaij cingzgvang le, cungj daeuj bang gou.

“Boiz! Boiz! Boiz!”De najhoengz lumj aen bingzgoj hoengz nei, mbouj gangj saek coenz. Dingq doengzhag baenzneix gangj, gou engq miz leix lo, lij ndaq de geij coenz.

Ma daengz ranz, gou dawz gienh saeh neix lwnh daxmeh nyi, ndaw sim siengj：Daxmeh itdingh bang gou！Byawz rox, daxmeh dauq naeuz:“Gienh saeh neix mwngz guh ndaej mbouj deng lo.”

Gou siengj：Neix dwg de loek lo, vih gijmaz bihbingz gou ne？Ciepdwk daxmeh menhmenh doiq gou naeuz:“Bouxvunz aeu gvanhyungz, danghnaeuz moix gienh saeh cungj suenq ndaej cing bae, bouxlawz lij caeuq mwngz guh baengzyoux ne……”

Dingq gij vah daxmeh le, siengjsiengj, naj gou nyaenx mbouj ndaej hoengzsisi lo, ndaw sim gig najmong.

Gij vah daxmeh, lumj aencung nei, seizseiz roq aen sim gou.

Ngoenzneix, gou doeg《Doxceng》bien govwnz neix le, caiq siengj gij vah daxmeh gangj gvaq haenx, engq lijgaij gij dauhleix ndaw govwnz lo：Guh vunz aeu hag rox gvanhyungz.

（指导老师：蓝卫松）