Ngoenzneix banhaet, yijvwnz lauxsae son daih 27 go《Aen Sigij Heuh Rumz Hemq Fwn》. Lauxsae yauhgiuz raeuz gyanghaemh ma ranz dawz govwnz doeg hawj vunzlaux dingq, caiq cingj gyoengqde gangj- gangj gij bienqvaq gohgi fazcanj daiq daeuj haenx.

Gwn caeuz sat le, gou cingj daxgoeng daxbuz、daxboh daxmeh naengh ndei, yienzhaeuh gig miz gamjcingz dwk doeg govwnz. Doeg sat le, gyoengqde bekfwngz hwnjdaeuj, cungj haenh gou doeg ndaej ndei. Gou doiq gyoengqde naeuz:“Sou cungj dwg seng youq 20 sigij, gou yaek dingq sou gangjgangj geijcib bi daeuj gij bienqvaq gohgi fazcanj daiq daeuj haenx. ”

Gyoengqde dingq le gig angq, gangj le gij saeh miz gven“ndaw ranz seiq yiengh dijbauj” hawj gou. Daxgoeng naeuz:“Aen seizdaih gou, ndaw sim gyoengqvunz ceiq siengj miz seiq yiengh dijbauj dwg soujbyauj、danci、souhyinhgih、cibuh.” Daxboh naeuz:“Daengz aen seizdaih gou, riengz gohyoz gisuz fazcanj, seiq yiengh dijbauj fatseng bienqvaq hung, seizneix gyoengqvunz ceiq siengj miz seiq yiengh dijbauj dwg densigih、luzfanggih、sijyihgih、mohdozceh.”

Daxboh yawj gou dingq dwk maez bae, lumhlumh aen gyaeuj gou, cam：“Lwg ha, seizneix seiq yiengh dijbauj ndaw sim sou dwg gijmaz ne?”Gou siengj le siengj, naeuz:“Dennauj、gyahdingz yingjyen、sumaj sienggih caeuq ciiq. ”Daxboh dingq le riuhaha naeuz：“Gij doxgaiq dijbauj neix raeuz itdingh miz. ”

Daxgoeng vahnaek cingzlaeg dwk naeuz:“Daj danci daengz mohdozceh, caiq daj mohdozceh daengz ciiq, dinjdinj geijcib bi, sevei bienqvaq yienghneix hung, gohgi cinbu yienghneix vaiq, caen siengj mbouj daengz ha. Lan ha, mwngz aeu roengzrengz doegsaw, daengzcog dawz guekcoj gensez ndaej engqgya fouqmiz.”

Gou dingq le ngaekngaek gyaeuj, sim siengj: Gou itdingh hawj daxgoeng daxbuz、daxboh daxmeh yiengjsouh daengz seiq yiengh doxgaiq dijbauj gou.