Mbwn laep lo, lohdaeng rongh myoxmyed henjndaem. Bouxsai ndeu gaem fwngz dahlwg dwggyaez de, angqvauvau byaij baema.

Sawqmwh, dahlwg dingz din roengzdaeuj, fwngz vix giz mbouj gyae haenx, doiq daxboh naeuz:“Daxboh, raeuz bangbang de ba!” Ndaw lwgda dahlwg hamz miz doengzcingz. Bouxsai swnh fwngz dahlwg yawj bae, yenzlaiz dwg goenglaux ndeu. Goenglaux umj aen ngeihyienz gaeuq ndeu, lwgda fouzsaenz dwk muengh gyangmbwn, baihnaj cuengq aen vanj hoengqvat, ndaw vanj rim namhfaenx. Bouxsai rag dahlwg menhmenh byaij gvaqbae, maeuq roengzdaeuj, yaeng- yaeng doiq goenglaux naeuz:“Laux sienseng, cingj mwngz daz ngeihyienz hawj gou dingq!” Goenglaux sien dwg lwngq yaep he, yienzhaeuh mizsaenz gvaqdaeuj, menhmenh daz aen ngeih- yienz ndaw fwngz de……

Sing ngeihyienz dingzdingz duenhduenh, lij miz di gaz, ciemh- ciemh dwk, youq laj ronghndwen loq rongh haenx bienq baenz souj go gig siliengz youh gamjvunz ndeu. Bouxsai dinghdingh dingq, goenglaux cibfaen nyinhcaen daz, lumjbaenz cingq dauqngeix gijmaz saeh gaxgonq. Dah lwgsau iq dingq mbouj rox gijmaz, cijndei yaep he yawjyawj goenglaux, yaep he yawjyawj bouxsai.

Souj go menhmenh sat lo. Bouxsai dawz aen vanjhoengq gaem hwnjdaeuj, sien baet seuq namhfaenx, caiq youq ndaw cuengq di cienz. Dahlwg yawj ndaej cingcing cujcuj, goenglaux gwnz naj nyaeuqnyat hawqhang haenx, venj song riz raemxda ndongqliklik. Goenglaux menhmenh ndwn hwnjdaeuj, yiengq bouxsai gungjhwet, sing saenzdedded naeuz:“Docih mwngz!” Bouxsai mbouj guh sing, cij doiq de riuriu, couh rag dahlwg de yaengyaeng byaij deuz lo.

Bouxsai yamqdin caemcingh byaij loh. Roxnyinh dahlwg mbouj lijgaij, de dingz din maeuq roengz- daeuj, nyinhcaen doiq dahlwg naeuz:“Hawj cienzngaenz doxgaiq bangcoh vunz, lij mbouj dwg cungj doengz- cingz fuengfap ceiq ndei he, hawj vunz guhhong vuenh cienz, yienghneix dwg hawj naj hawj vunz, dwg cunhcung de, mwngz hix aeu hag rox cunhcung bouxwnq, rox lwi?”Dahlwg nyeux gyaeuj yawjyawj goenglaux haenx, ronghndwen cingq ciuq youq gwnz naj de, lumjbaenz cingq ngeix gijmaz. Dahlwg nyeux gyaeuj dauqma, yawj ngaezvaegvaeg. Bouxsai riuriu, danq gaemz heiq ndeu, yienzhaeuh lumhlumh aen gyaeuj dahlwg, unqswnh naeuz:“Majhung le, mwngz couh mingzbeg lo.”Gangj sat, bouxsai youh rag fwngz iq dahlwg byaij baenaj lo.

Haemh laep haeuj hwnz lo, lohdaeng beij haxbaenh ronghsag, henz dujrwz lij dwg souj go aen ngeihyienz siliengz youh gamjvunz haenx.              （指导老师：雷振览）