Gwnz loh hwnj hag, gou yawjraen henz loh bouxcanghbuenq gai gij gyoij haenx saedcaih nyex vunz bakngah, couh yot gij cienz lingzyungh daxmeh ngoenzneix hawj haenx, cawx le gaen gyoij ndeu.

Daengz bakdou hagdangz, gou hag gwnz densi bouxmingzsingh lanzgiuz “douzlamz sam faen”, dawz gij naenggyoij haenx doiq cinj aen doengj nyapnyaj gyae’gyae haenx baez douz. Aeya! Hojsik gou douz mbouj cinj, gij naenggyoij doek youq henz doengj lo.“Luenh vut nyapnyaj. Mwngz dwg ban lawz?” Boux cizyizswngh laengz dawz gou, gou cang guh mbouj dingqnyi, cigsoh byaij bae gyauyoz- louz. Cizyizswngh raen gou mbouj leixlangh, ndatheiq dwk nyoengx gou daengz henz ciengz. Gou hix ndatheiq lo, swnh fwngz baez ndengj, cizyiz- swngh deng gou ndengj soenx lo. Baezneix, boux cizyizswngh engqgya huj baenz feiz nei, lumj yaek aeu mingh gou ityiengh, yiengq gou bag daeuj. Bonjlaiz gou couh simhaw, baez nyaenxheiq lienzmuengz doiq dauq- laeng, siengj mbouj daengz, gou baez doiq dauqlaeng cingq caij deng gij naenggyoij swhgeij vut haenx, gij saeh boihseiz fatseng lo—cik ga baez conj, daengx aen ndang dingjai dwk,“dub” sing ndeu, aen gyaeuj gou saeg roengz gwn namh bae, gyaeuj ok lwed lo. Gou“w w” daej hwnjdaeuj.

Doeklaeng, cizyizswngh heuh lauxsae daeuj lo, dawz gou soengq bae yihyen……

Gienh saeh neix gvaq le, gou caen gag ienq: Hag gijmaz“douzlamz sam faen”? Danghnaeuz gou lauxlaux saedsaed dawz gij naenggyoij cuengq haeuj ndaw doengj nyapnyaj bae, couh mbouj rox caeuq boux cizyizswngh doxceng, couh mbouj caij deng gij naenggyoij conj laemx, danghnaeuz mbouj conj laemx, aen’gyaeuj couh mbouj deng sieng……

Gienh saeh neix hawj gou roxdaengz bok nyapnyaj aeu byaij bae gaenh aen doengj nyapnyaj, gaej guh vunzgik. Guh saeh loek aeu rox nyinh loek, rox gaij gij loek.

（指导老师: 潘艳英）