贵港市覃塘区蒙公乡

高占小学五年级 周业琳

Moixdang gou yawjraen daeg- nuengx iq roxnaeuz dahnuengx iq ngamq vuenh diuzheuj bae, loh ok gij diegheuj vauqvatvat seiz, gou couh siengj hwnj seiziq gienh saeh ndeiriu haenx.

Haenx dwg gou doeg it nienz- gaep seiz, diuz heujnaj gou yaek doek lo, sojyij mboujlwnh dwg hwnjdangz roxnaeuz gwnngaiz, gou cungj doiq de daegbied siujsim. Hoeng, de cungj gyaez caeuq gou doxdingj, baenzlawz hix mbouj haengj “roengzban”.

Miz ngoenz ndeu, gou bae ranz mehbaj guhcaemz, dahcej hawj naed diengz hung hawj gou gwn. Gou cingq angq dwk haeb naed diengz, sawqmwh diuz heujnaj haenx doek roengzdaeuj lo. Dahcej lienzmuengz naeuz:“Vaiq di dawz diuzheuj gveng hwnj gwnz dingjranz bae ba, mboujnex, heuj moq couh maj mbouj okdaeuj lo.”“Dwg caen lwi?”Gou yaek saenq mbouj saenq. Dahcej youh daegdaengq naeuz:“Gveng diuzheuj seiz, song din aeu doxhop, mbouj ndaej faenhai, mboujnex, diuzheuj moq maj okdaeuj couh mbeuj lo.”

Gou sikhaek byaij ok bakdou, dawz diuzheuj gveng hwnj ranzmou bae, hoeng aenvih yungh rengz gvaqbouh, gou ndang soenx bae naj, song din faenhai lo! Gou gip dwk daemh din daemh namh, gag nambedbed:“Baezneix sat lo, danghnaeuz maj ok diuzheuj cot, haenx couh cuij lai lo. Gou mbouj siengj bouxwnq heuh gou guh‘dah heujcot’ne. Neix baenzlawz banh cijndei ne?”Gou lwgda baez cienq, sikhaek aeu lae daeuj hwnj dingj ranz bae ra diuzheuj, dajsuenq caiq gveng baez ndeu. Gou byaengq hung lwgda, youq gwnz ranzmou ra ha ra, hoeng baenzlawz hix ra mbouj raen diuz heujnaj gou lo. Dahcej gvaiq gou naeuz:“Mwngz baenzlawz yienghneix mbouj siujsim? Ai, yienghneix cijndaej caj heujmoq maj okdaeuj le, caiq bae euj cingq lo.”“Gijmaz? Euj cingq? Couh dwg daiq fouq ganghguh? Gou cij mbouj bae ne!”“Haenx youz mbouj ndaej mwngz lo, daengz seizhaenx daih- gya couh heuh mwngz guh‘dah heujdiet’lo, huvei!” Dahcej lij riuhehe, gou hozndat lai lo, hoeng youh gangj mbouj ndaej gvaq de, cijndei nyaenx heiq buet baema ranz swhgeij lo.

Daj haenx hwnj, gou moix haet cat heuj seiz cungj ciuq aen gingq yawj diuz heuj moq maj okdaeuj haenx. Bingzseiz baez siengj daengz de, couh aeu diuzlinx roengzrengz dingj de, lau de maj mbeuj lo. Couh yienghneix, gou moix ngoenz sim diuqboebboeb doh gvaq, diuzheuj moq gou dauqdaej maj ndei lo. Docih aen mbwn aen deih, dahcej dwg yaeuh gou, heuj moq gou maj ndaej youh cingq youh hau, cungj suenq mbouj hawj gou saetmuengh ha!

Seizneix, gou doeg haj nienz- gaep lo, dahcej baez dwen hwnj gij saeh gou vuenh heuj haenx, gou couh aeu fwngz bae goemq aen bak de, doeklaeng dou cungj riuhaha hwnjdaeuj lo.

（指导老师：覃珍团）