□Dwzbauj Yen Lungzsangh Cunghsinhyau seiq nienzgaep Luz Lizliz

Daxmeh gou dwg mehmbwk lajmbanj, de ndang reux, haemq sang, bouxvunz unqsunh. Gou gyaez daxmeh gou.

Daxmeh ceiq ndiep gou, hix dwg boux lauxsae yiemzgek gou. De youq gwnz swnghhoz gvansim gou. Lij iq seiz, gou maj ndaej youh byom youh iq, daxmeh youh sim’in youh gip. Vihliux hawj gou maj ndaej cangq, daxmeh moix ngoenz cawj gij byaek feihdauh gou gyaez gwn haenx hawj gou gwn, moix baez gou gwn yiengh byaek dog seiz, daxmeh couh lwnh gou naeuz, gwn yiengh dog doiq ndangdaej mbouj ndei, danghnaeuz ndangdaej mbouj ndei, couhcinj miz bonjsaeh hung hix mbouj rox gensez guekcoj. Doeklaeng, gou dingq daxmeh gangj, mbouj genj gwn, ngoenz beij ngoenz maj ndaej cangq, daxmeh sim’angq raixcaix. Daxmeh gig yawjnaek son gou guh vunz, de son gou miz doxgaiq ndeigwn seiz, sien hawj bouxgeq gwn. Miz baez ndeu, youq ranz daxbuz gwn nohbit, gou nip gaiq noh gabit roengz ndaw vanj daxgoeng bae, daxgoeng ndiep dwk riu naeuz:“Siujfangh caen dwg boux lwgnyez ndei.” Daxgoeng coenz vah neix mboujdan dwg haenh gou, hix dwg haenh daxmeh.

Youq ndaw yozsiz, daxmeh doiq gou yauhgiuz yenzgwz. Geiq ndaej gou ngamq hwnj siujyoz seiz, gou causij cihmoq, lujlaj song mbat couh sij sat lo. Daxmeh baez genjcaz, mbouj gangj lai, hawj gou cienzbouh cat bae caiq sij moq. Baez hit neix, gaek youq ndaw uk gyaeuj gou laeglaeg bae, daj baez haenx hwnj, gou causij cihmoq gig nyinhcaen, moix baez cozyez, gou cungj ndaej bak faen, youq hagdangz gijhingz yienzbit sijcih doxdax, gou lij ndaej ngeih daengj ciengj ne!

Daxmeh, gou gyaez mwngz! Mwngz doiq gou gak fuengmienh gvansim caeuq maqmuengh, gou cungj youq ndaw sim geiq dwk, youq mwngz gvansim baihlaj, gou cingq angq maenh maj hung. Docih mwngz, daxmeh!

(cijdauj lauxsae: Lingz Binjcoz)