Seizhah mbwn hwngq, daenj haizgieg liengzsangj, vunz lajmbanj maij rag haizgieg youq gyanghongh byaij bae byaij dauq, sing yiengjdekdek, dingq le gag raen miz cungj yinxdaeuz he.

Haizgieg gig genjdan, najhaiz mbouj itdingh aeu guh dwk ndongqmyammyam, mbouj itdingh aeu saidaiz maenhsaedsaed, cij aeu gawq donh benj geng he, ciuq yiengh din hung raez veh vunq, aeu bauh bauh geij mbat; najhaiz loq luemj, daejhaiz caeuq bienhaiz mizdi cocad; ra donh gau lunzdaih gaeuq he, ciuq din hung iq raed aeu diuz he, ding roengz gwnz daejhaiz bauh ndei haenx bae, din baez con haeujbae, couh ndaej daenj de byaij roen lo.

Mbouj miz gij baengz gij naeng got dwk maedsaedsaed, din cienzbouh loh youq baihrog, doengheiq cwxcaih. Rumz cifefe gvaqdaeuj, liengzsisi, mbouj yungh cug saihaiz sinhoj, baez hwnq mbonq, din baez con, couh miz gij sing haizgieg yiengjdekdek mbouj dingz mbouj duenh. Couhcinj dwg ngoenz fwndoek, gwnz namh miz raemx hix ndaej vaijloeploep gvaqbae, raemxfwn lumh gvaq najdin, raq liengzsangj he daj byaidin cienz hwnj ndang hwnj gyaeuj daeuj.

Mwh lij iq, aenvih ranz gungz, gou dingzlai dwg lohdin, saek seiz hix nanzmienx deng gij doxgaiq geng haenx coeg sieng, incumcum, hawj vunz hojsouh. Daxboh gig saeqsim, de raen le, gig sim’in. Daxboh miz di dinfwngz, maij doeng loengh sae loengh di doxgaiq, couh caegcaeg gaem fag caxfwnz, bae ndaw dong benj gaeuq senj gep benj geng he, aeu gawq gawq baenz geij donh, aeu cik bang daengx ranz vunz dag din; gaen dwk couh laebdaeb guh haizgieg. Gyangngoenz roengz doengh guh hong, gyanghaemh ma ranz bauz geij amq haeux le, couh diemj aen daengz meizyouz myoxmedmed haenx, gungj hwet dwk, menhmenh muz najhaiz, sing dikdik daekdaek ciengzciengz yiengj daengz byonghhwnz.

Miz gouh haizgieg daej nanwtnwt he le, fajdin couh mbouj deng rin camx cenx coeg lo, byaij youq gwnz diuzroen rinbenj ndaw mbanj, daej haiz gvaek roengz gwnz rinbenj bae, yiengjdekdek, gig miz yinxdaeuz.

Cijdwg baez daengz gyanghwnz, gij sing dekdek haizgieg ndeidingq haenx couh noix lo, lwgnyez caeuxcaeux hwnj mbonq bae ninz, cij lw gij sing yiengj haizgieg bohmeh nyaengq guh hong haenx. Gij sing haizgieg bohmeh mbouj menhyouz geijlai, bohmeh ndawndaw rogrog nyaengq guh gij hongranz, ganj youq ngoenzcog okgoeng gaxgonq, dawz hongranz guh sat bae, yienghneix roengz doengh guh hongreih hongnaz couh sim’onj lo. (Moz Gingjcunh)