贵港市覃塘区蒙公乡

高占小学五年级 黄秋静

Gou iq seiz, ceiq hozhaenz vunzhung: Aen ndang sangngaungau, mboujguenj gijmaz doxgaiq ndeigwn cungj aeu ndaej daengz. Gou geijlai maqmuengh swhgeij vaiq di maj sang ha! Ndigah gou moix ngoenz cungj gyaez ciuq gingq, yawjyawj swhgeij maj sang mbouj caengz.

Dahnax iq ceiq rox simsaeh gou. De laeglemx lwnh gou: Gvaq cieng seiz, youq gungxdou caegcaeg diuq sam diuq, couh ndaej maj sang lo. Gou dingq le, sim’angq ndaej diuqbwngbwng hwnjdaeuj, lumj- baenz swhgeij gaenq maj sang le ityiengh.

Gou muengh ha muengh, dauqdaej daengz gvaq cieng lo. Ndwencieng co’it haetcaeux, gou daenj buhvaq moqsatsat, swnh bouxhung mbouj haeujsim seiz, caegcaeg buet ma ndaw rug, byaij daengz gungxdou dinghdingh ndwn dwk, sien haenqrengz sup gaemz heiq he, caiq yungh rengz diuq hwnjdaeuj, it、ngeih、sam, doeklaeng laep lwgda naihsim dwk caj maj sang. Mbouj yaep he, gou daengx ndang ndathuhu, gwnz fwngz hix hanh cumx lo, vunz lumjbaenz hix menhmenh yiengq gwnz maj、maj、maj……

“A, gou maj sang lo!”Gou angq ndaej hemq sing hung dwk buet ok dou rug, buet daengz dangqnaj daxmeh. Gou siengj: Gou seizneix dwg vunzhung lo, wnggai dawz ok gij yiengh vunzhung daeuj. Sojyij, gou gyajcang “e e”ae song sing laux, siengj yinx daxmeh yawj gvaqdaeuj. Yienzhaeuh, ngiengxgyaeuj enjaek, saenzheiq dwk naeuz:“Daxmeh, mwngz yawj, gou maj sang lo, hix dwg vunzhung lo.”Daxmeh moengjdoengj dwk daengx lwgda yawj gou haijlai nanz, cij naeuz:“Mwngz dah lwgnyez ngawz neix, mwngz lij mbouj dwg yiengh haenx ma? Mwngz siengj maj sang cungj siengj fatbag la!”Gou dingq gij vah daxmeh le, lwngq lo. Hoeng, youh siengj: Gou gaenq diuq sam baez lo, baenzlawz gojnaengz lij dauq dwg yienghceij gaxgonq ne? Gou mbouj fugheiq dwk buet daengz henz aen gingq hung, ciuqciuq gingq, yawjraen ndaw gingq gou lij dwg daemqdetdet, lwgda gou myox lo, raemxda lumj baenz naed duhhenj hung doekbyoegbyoeg roengzdaeuj, nyex ndaej daengx ranz vunz cungj riuhaha hwnjdaeuj.

Doeklaeng, gou cij rox dahnax iq dwg yaeuh gou. Moix baez siengj hwnj gienh saeh neix, gou cungj nyaenx mbouj ndaej fwt riu hwnjdaeuj.               （指导老师：覃珍团）