Lauxsae、doengzhag:

Daihgya ndei. Mbat neix gyoengqraeuz hopheux “Guekcoj Youq Ndawsim Gou” aen cujdiz neix，gaihcanj le baez swnghhozsing yozsiz hozdung ndeu. Youq mbat hozdung neix，raeuz rox le guek raeuz haujlai vunz okmingz gyaez guek haenx，rox le haujlai gojgaeq gyaez guek gyoengqde，caemhcaiq ciepsouh daengz gyauyuz gig laeg，gyagiengz le gyaezguekcujyi cingzcauh.

Aiq miz mbangj doengzhag cam gou:“Gyaez guek gyaez guek，gawq yawj mbouj raen，hix lumh mbouj dawz，gijmaz heuh guh gyaez guek？Caiq baenzlawz gyaez guek ne?” Dwg ha，mwngz daez aen vwndiz neix, couh dwg ngoenzneix gou yaek gangj lo，aenvih aen dapanq vwndiz neix couh dwg gou youq mbat swnghhozsing yozsiz hozdung neix souhhoz ceiq hung he.

Gijmaz dwg gyaez guek ne，Lezningz gangj：“Gyaezguekcujyi dwg cungj gyaez guek cingzeiq ceiq laeg ndeu, de dwg cingzeiq cien bak bi cienz roengzdaeuj sawj vunz gag rox gyaez guekcoj swhgeij.” Gou roxnyinh，Lezningz gangj ndaej gig deng，gyaez guek couh dwg cungj cingzeiq ndeu，cungj cingsaenz ndeu. De dijyen youq ndaw gidij hengzdoengh bouxvunz.

Ciuh Cunhciuh, Yenswj mbouj baenz mbauq，hoeng baengh aen bakraeh de，buek hingz Cujvangz，veizhu le guekgya cunhyenz，gij cingsaenz de ndaej hawj raeuz hag. Ciuh Cangoz Lin Siengyuz，vihliux gouq guekgya mbouj deng Cinzgoz hoenx ciemq，mbouj goq diuzmingh swhgeij, daiq Hozsibiz bae Cinzgoz, doeklaeng de mbouj guhfu Cauvangz saenqnyaemh，ndeilili dawz Hozsibiz ma Caugoz, lij sawj Caugoz mienx deng cainanh.

Gyaez guek mboujdan dwg aeu coengmingz doengh uk， vanzlij aeu mbeihung maenh’ak. Ciuh Handai boux cienglingj okmingz Lij Gvangj，aemq cax gwih max，youq gwnz cancangz bonghfaengfaeng，dawz Yunghnuz gaj dwk cungj mbouj lw saek boux. Mingzcieng Yoz Feih ciuh Sungdai，caen gyaez guekgya，youq gwnz cancangz，baklem hawj dizyinz saenqdaenh. Ciz Gi’gvangh seiz Mingzcauz，caenndang hai ruz bae boenq caeggeq Yizbwnj. Engq miz Yangz gyahcieng sai mbwk laux iq， itheij bae cancangz，vih guekgya vutmingh……Daj ciuhgonq daengz seizneix，boux gyaez guek geq cungj geq mbouj liux，goenglauz gyoengqde ciengxlwenx geiq haeuj ndaw lizsij.

Gyaez guek mbouj faen gviq cienh，mbouj faen laux caeuq nyez. Bouxguen bouxhak ndaej gyaez guek，gyoengq beksingq caemh ndaej gyaez guekgya. Sunh Cunghsanh hoenx caeggeq dwg gyaez guek，Linz Cwzciz youq Hujmwnz coemh iennamh dwg gyaez guek，Canh Denhyou cujciz coih guh dietloh caemh dwg gyaez guek. Youq ngoenzneix，gij lwghag daj guek rog dauqma，gensez guekgya dwg gyaez guek，gaijfangginh henhoh henzguek dwg gyaez guek，couhcinj dwg bujdungh gunghyinz、nungzminz gangj coenzvah gvansim guekgya， di gungyen ndeu，caemh dwg gyaez guekgya.

Gyaez guekgya dwg cungj cingzeiq ndeu，cungj cingsaenz ndeu. Gyaez guekgya dwg gidij，gyaez guekgya caemh dwg saedcaih. Gyoengq hagseng iq raeuz caemh ndaej gyaez guekgya, cijaeu raeuz miz aen sim bauqyauq guekcoj，roengzrengz hag gohyoz vwnzva cihsiz， raeuz couh dwg gyaez guekgya. Vih le hawj guek raeuz fouqmiz，vih le guek raeuz hungcangq，raeuz roengzrengz doegsaw，itheij fwndou ba!（指导老师：潘彩波）