Daj hwnj haj nienzgaep daeuj, lwgda gou couh ginsi lo, daxboh couh hanh gou mbouj ndaej yawj densi, hoeng gou cungj mbouj dingq.

Ngoenz singhgiz ndeu, mbwn gvengq, daxboh daxmeh bae yawj daxdaiq lo, gou cix mbouj bae ne! Aenvih gou ndaw sim miz cawqeiq lo.

“Bwngz”, bakdou gven ndaet lo, gou sim- angq raixcaix, sim siengj: Daxboh daxmeh cungj okbae lo, gou gojyij caeg yawj densi lo! Ye, gou youz mbouj ndaej yaengx song cik fwngz diuq hwnjdaeuj, hoeng aenvih gwnz dieg dumz lai, gou diuq hwnjdaeuj, dauq ndwn gwnz dieg seiz, mbouj siujsim laemx daengjhai gwnz dieg, seiq din yiengq mbwn lo, gou goq mbouj ndaej caekhaex in, luenz hwnjdaeuj bae hai densi, mizfeih fwdfwd dwk yawj dungvaben lo.

Sawqmwh, “dwngdwng” sing din yiengj, lumjbaenz miz vunz ma lo. Gou sikhaek dawz sing densi siu bae, yienzhaeuh dinfwngz mbaeumbi’mbi byaij daengz henz dou, nyinhcaen baez dingq, caiq daj yangzdaiz yiengq laj muengh, hai, baenzlawz dwg bohmeh ne, mingzmingz dwg ranznden lungzsam byaij gvaq ya, gou caen dwg siengj lai lo!

Gou youh maezmwd yawj densi hwnjdaeuj lo. “Dihdah” nauhcung yiengj lo, gou ngiengx gyaeuj baez yawj, haiya, 12 diemj cung lo, daxboh daxmeh lijcaengz dauqma, gou dungx iek lo, caiq mbouj miz sim yawj densi lo. Gou ndaep ndei densi, hag yawj bonjsaw hwnjdaeuj, hoeng, lijcaengz yawj ndaej mbaw saw ndeu, youh dingqnyi yamqdin yiengj lo.

Bakdou “dang” sing ndeu hai lo, cijraen daxboh naj hoengzfwdfwd, gwnz fwngz gaem mbaw bauq gvangjgau, baez hamj haeuj ma, couh yiengq densi buet bae, gou sim siengj: Daxboh, gou guh ndei cinjbi lo, daeuj ba, lemh gou ndaq gou cungj ndaej. Raen daxboh cuengq fwngz gwnz densi bae, gou laep lwgda siengj: Sat lo, densi lij ndat ne, gou lijdwg vaiq di nyinh loek ba!

Yienghneix, gou byaij daengz dangqnaj daxboh, gazdwddwd dawz aen saeh caeg yawj densi lwnh hawj daxboh nyi, daxboh baez dingq, lumhlumh aen densi, naj bienq ndaej yiemzsuk hwnjdaeuj, yaepyet, youh riuhaha hwnjdaeuj, gou lwngq lo, mbouj rox daxboh ndaw gyongq gai gijmaz.

Daxboh riu gaeuq le cij naeuz: “Lwgngawz, gou bonjlaiz siengj doiq mwngz gangj, dou cawx aen densi neix seiz cienh, seizneix hwnjgyaq daengz 1200 maenz ngaenz lo. Gou mbouj rox mwngz caeg yawj densi ne, siengj mbouj daengz mwngz mbouj cam gag gangj lo!” Gangj sat, youh riuhaha hwnjdaeuj, caen dwgcaengz, lienz daxmeh hix gaen riu hwnjdaeuj lo, cijmiz gou boemz youq gwnz sahfaz siengj daej.

（指导老师：覃珍团）