Gou gyaez daxmeh, dwg aenvih daxmeh gyaez gou.

Daj gou rox geiq saeh hwnj, couh roxyiuj gij gyaez daxmeh dwg yienghhaenx unqswnh raeujrub.

Geiq ndaej gou ndaej 7 bi bihaenx, miz baez ndeu, caeuq geij boux baengzyoux ndaw mbanj caegcaeg itheij bae ndaw dah youzraemx, cig daengz mbwn ciemhciemh laep cij dauqma ranz.

Ngamq dauq daengz ranz, laihnaeuz deng daxmeh ndaq lo, hoeng mbouj siengj daengz, daxmeh yawjraen gou le, couh yiengq gou buet gvaqdaeuj, yungh rengz dawz gou umjgot haeuj ndaw rungj de bae, got dwk youh ndaet youh rengz. Gvaq haujlai nanz daxmeh caiq soeng hai fwngz, unqswnh doiq gou naeuz:“Bae gwn haeux lo, byaek couh yaek liengz lo.”

Youq henz congz gwn haeux seiz, daxmeh mboujdan mbouj ndaq gou, dauqfanj son gou, naeuz:“Baezlaeng bae gizlawz aeu lwnh hawj daxmeh rox, daxmeh cij mbouj yousim.”

Ngoenzhaenx byonghhwnz, gou daengx ndang fatndat lumj feiz coemh ityiengh, baenzlawz hix ninz mbouj ndaek. Youq ndaw moengzloengz, gou dingqnyi daxmeh cam:“Sau iq, mwngz baenzlawz la? Dwg mbouj dwg fatndat?” Ciep dwk daxmeh yungh fwngz lumhlumh najbyak gou.“Aiyo, caen dwg fatndat lo, seizneix youh dwg byonghhwnz, baenzlawz guh ne?”Gou cij dingq daengz gizneix, gij vah doeklaeng couh dingq mbouj cingcuj lo.

Mbouj rox seizlawz, aen ndang gou lumj deng vunz umj buet hwnjdaeuj. Youq ndaw moengzmoengz loengzloengz, gou dingqnyi daxmeh baegfufu, gou menhmenh ndw da, moengzloengz yawjraen daxmeh cingq umj gou ganj loh. Seizhaenx daxmeh daengx ndang buh hanh cumx lo. Gou unqunq doiq daxmeh naeuz:“Daxmeh, cuengq gou roengzdaeuj ba, gou lij rox gag byaij.” Daxmeh mbouj dingq gij vah gou, de naeuz:“Sau iq, caiq dingj yaep he ba , couh yaek daengz yihyen lo……” Doeklaeng, gou youh muenh gvaqbae lo.

Daengj gou singj gvaqdaeuj, gaenq dwg ngoenz daihngeih haetromh. Yawjraen daxmeh boemz youq henz ndang gou ninz ndaek lo.

Gou gyaez daxmeh gou, dwg aenvih daxmeh gvansim gou gyaez gou.

(指导老师：黎才新)