Duenh neix, yozyau gawjhengz baez yenzgiusing godiz hozdung ndeu, cujyau muzdiz dwg fazcanj gij suciz raeuz, laebdaeb fungj cangcau cingsaenz caeuq sevei sizcenj naengzlig raeuz. Gou bauqmingz camgya Lij lauxsae cijdauj《Gofaex Caeuq Yinzdij Gengangh》aen godizcuj neix. Vihliux liujgaij mizgven saenqsik, cuj raeuz doengzhag gag yienj gij bonjsaeh cihgeij, mizmbangj youq gwnz vangj caz swhliu, mizmbangj bae duzsuhgvanj yawj saw caz swhliu，hoeng gou byaij ok bakdou, daengz gwnz sevei gauj diucaz, gou cingjleix diucaz neiyungz, veh baenz byaujgwz.

Ngoenz singhgiz gyanghaet, gou gwn haeux gvaq le, couh gip dwk byaij okbae, daeuj daengz gwnz gai giz vunzlai. Muengh gyoengqvunz byaij bae byaij dauq haenx, gou miz di dawz mbouj dingh cawjeiq. Seizneix miz boux mehmbwk ndeu byaij daeuj coh gou. “Bae mbouj bae cam de ne？Lij dwg……”Gou cingq gag gangj gag naeuz seiz, boux mehmbwk haenx gaenq daj henz ndang gou byaij gvaqbae lo. Gou vih gijmaz baenzneix damjsiuj ne? Gou dwg guh vwngenj diucaz, youh mbouj dwg guh gijmaz saeh najmong, caiq gangj lauxsae mbouj dwg ciengzseiz doiq raeuz gangj, aeu siengsaenq cihgeij, aeu doiq cihgeij naeuz “gou guh ndaej”ma? Yienghneix gou enj aek, ngiengx gyaeuj, ndaw bak nam naeuz:“Gou guh ndaej, gou guh ndaej.”Couh byaij hwnjbae lo. “Boh’au, gou ndaej cam mwngz aen vwndiz ndeu lwi？”“Ndaej ha.”“Mwngz rox gofaex doiq raeuz miz gijmaz ndeicawq lwi？”Boh’au siengj le naeuz:“Gofaex gojyij sup gij faenz, hawj vanzging bienq seuq bae；lij ndaej caux haujlai yangjgi, giz gofaex lai, hoengheiq couh singjsien. ”“Docih mwngz, caiqraen!”Haha, gou cwngzgungh lo! Youh miz boh’au daep nganxgingq ndeu byaij gvaqdaeuj lo, yienghceij gig miz vwnzva, gou angq dwk cung hwnjbae naeuz:“Boh’au，Mwngz rox gofaex doiq raeuz miz gijmaz ndeicawq lwi?”Boh’au riunyumnyum dwk doiq gou naeuz:“Ndeicawq lai raixcaix lo, gojyij meijva vanzging、sup wyangjvadan，caux yangjgi、dangj ndit、dangj faenz，fuengzre gij raemx namh siusaet……”Gou mienh dingq, mienh geiq, ndaw sim gig boiqfug boh’au miz vwnzva. Seizneix youh miz boux mehmbwk daiq lwgnyez gvaq- daeuj, gou byaij hwnjbae cam：“Mehgux, mwngz rox guek raeuz ngoenzlawz dwg ciet ndaem faex lwi?”Lij caengz caj boux mehmbwk haenx gangj vah, henz ndang daegnuengx haenx couh naeuz:“3 nyied 12 houh.”“Daegnuengx mwngz caen coengmingz! Mehgux, mwngz lij rox seiqgyaiq dizgiuzyiz、vanzgingyiz dwg ngoenz lawz lwi?”“Neix……doiq mbouj hwnj, gou mbouj cingcuj.”Mehgux veiznanz dwk naeuz. Gou cijndaej bae cam bouxwnq, doeklaeng cungj dwg “mboujrox”, neix baenzlawz banh ne? Couh yienghneix gezcuz la? Deng，bae bakdou Sanglinz Cunghyoz yawjyawj, Sanglinz Cunghyoz daeggo dahcej gojnaengz rox. Gou lumj mbin nei byaij coh Sanglinz Cunghyoz, laengz boux daeggo ndeu, baez cam, daeggo cungj han ndaej deng:“Seiqgyaiq digiuzyiz dwg４nyied 22 hauh, vanzgingyiz dwg６nyied５hauh, lijmiz seiqgyaiq gisiengyiz dwg３nyied 23 hauh.”Ndei ha, mwngz lij bujcungh aen dem, gou vih gijmaz mbouj cam de nanz di ne. “Daeggo, mwngz lij rox guek raeuz ndoengfaex fuzgailiz dwg geijlai lwi?”De siengj le naeuz:“Gojnaengz dwg 13.9% ba.”Dingz yaep he naeuz:“Deng, couh dwg 13.9%, noix lai lo, raeuz wnggai hengzdoengh hwnjdaeuj, raemj noix di, ndaem faex lai di, mwngz gangj deng lwi?” Gangj sat gip dwk deuz lo.

Haet neix daeuj, gij yinvu gou vanzcwngz lo, gou hix angq dwk baema ranz.   （指导老师：蒙绍山）