Ndaw ranz daeggo ciengx duz ma ndeu. Duzma neix ndang longz diuz buh saek henjcaz，maj miz doiq da hung baenqletlet he，diuz rieng hung ciengzseiz bi bae bi dauq，gij yiengh haenx gig veihvuj．

Moix baez gou bae ranz daeggo，yaek haeuj bakdou seiz，de couh raeuq dwk buet okdaeuj，baez raen dwg gou，couh yak bienq soh，“hwnghwng” song sing，nyouqnyouq din gou，yienzhaeuh bi diuz rieng gaen youq baihlaeng gou，riengz gou byaij haeuj ndaw ranz bae．Gou caeuq daeggo doxdongx le，couh caeuq duzma guhcaemz lo．Gou aeu doxgaiq de gyaez gwn haenx bau hwnjdaeuj，de couh aj bak diuq hwnjdaeuj ciep doxgaiq gwn，itmienh gwn itmienh yungh ndang daeuj lad gou. Gou lij caeuq de baenq gien guhcaemz，gou baenq daengz baihlaeng yungh fwngz lumh diuz rieng de mbat ndeu，caiq buet，caiq lumh……De aj bak dwk，mbouj dingz riengz gou baenq gien．Gou buet baeg lo cij dingz roengzdaeuj，de hix baegfofo dwk iet yinx okdaeuj，maeuq dwk yawj gou，gij yiengh de mizyinx raixcaix．

Ngoenzlwenz gou youh bae ranz daeggo guhcaemz，caeuq duzma caemz yaep he le，gou couh caeuq daeggo itheij yawjsaw．Mbouj rox gvaq le geijlai nanz，sawqmwh daj baihrog cienz daeuj sing daej lwgnyez，ciep dwk ma raeuq mbouj dingz．Gou caeuq daeggo sikhaek cuengq cek saw buet okbae．Cij raen duzma hung ndeu rig heuj aj bak yaengyaeng byaij gyawj henz ndang dahsau iq song sam bi ndeu， dahsau iq deng ma hung hwk lau dwk daejnga’nga hwnjdaeuj．Gou ganjvaiq buet gvaqbae umj dahsau iq deuz．Seizneix，duzma daeggo cingq yiengq ma hung raeuq，cij raen de “fw”sing ndeu, daihdamj buet gvaqbae, caeuq ma hung doxhaeb hwnjdaeuj，ma hung siengj mbouj daengz duzma beij de iq haujlai，gingqyienz yienghneix mbeilaux，hix lau geij faen，doxhaeb geij baez le couh najmongmet dwk buet deuz lo．Duzma daeggo yawj gij ngaeuz ma hung bae gyae haenx，lij raeuq mbouj dingz，lumjbaenz naeuz:“Baezlaeng gou raen mwngz hangz lwgnyez，itdingh mbouj cuengq gvaq mwngz!”

Yawjraen gij yiengh duzma hingzsaenz raixcaix，gou daj ndaw sim boiqfug de．