Ranz gou ciengx song duz gvi gig dwggyaez，duz ndeu hung, duz ndeu iq，gou daegbied gyaez gyoengqde. Aen gyaeuj duzgvi dwg sam gak；fouq lwgda iq loh ok gij rongh；aen ndaeng de gig daegbied, mbouj miz byai ndaeng. Aen hoz de ndaej iet youh ndaej suk, miz seiz iek okbae roek caet lizmij. Gwnz ndang aemq aen hak lumj aen vanj hung nei, gig ndongj. Henz hak miz gij oen iq.

Duzgvi ngamq daengz ranz gou seiz mbouj gwn hix mbouj doengh, aen gyaeuj suk haeuj laj hak de, lumj hozndat nei. Gou gip dangqmaz, sawqmwh gou siengj daengz：Boh’au gai duzgvi haenx lumj naeuz gvaq cijaeu mwngz dawz cik dawh ndeu daeuj, dawz gijgwn cuengq youq gwnzde, duzgvi couh iet gyaeuj okdaeuj gwn. Gou anqciuq boh’au gangj haenx bae guh, dahraix, duzgvi iet gyaeuj okdaeuj gwn doxgaiq lo. Gvaq geij ngoenz le, duzgvi ciemhciemh sug gij vanzging neix, couh haicij hozdung lo.

Ngoenz ndeu, gou daegdingh dawz gyoengqde cuengq youq aen gang ndeu, yawj gyoengqde youh siengj guh gijmaz. Cijraen duzgvi hung ca mbouj geijlai ciemq aen gang liux bae, cihgeij youq ndawde youz, duzgvi iq deng bik ndaej mbouj miz dieg youq. Duzgvi iq baez diuq, diuq daengz gwnz baihlaeng duzgvi hung bae, song aen nyauj lumj gaem maenh aen ndang duzgvi hung nei, mboujlwnh duzgvi hung baenzlawz faet cungj faet mbouj ndaej okdaeuj!Duzgvi hung baegfofo lo, lumj dwg naeuz：“Mwngz caiq mbouj roengzdaeuj, gou couh hozndat lo!”Duzgvi iq lij mbouj doengh saekdi, lumj dwg naeuz：“Danghnaeuz mwngz hawj gaiq dieg ndeu hawj gou, gou sikhaek roengzdaeuj!”Duzgvi hung mboujmiz banhfap, cijndaej doenq aen ndang, hawj giz dieg ndeu hawj duzgvi iq. Yawjraen gij cingzgingj neix, gou nyaenx mbouj ndaej riu hwnjdaeuj, nyaenx mbouj ndaej dawz fuk veh neix veh roengzdaeuj.

Duzgvi iq geijlai coengmingz ha!Gou nyienh de caeux di majhung！

（指导老师：覃仲南）