Bineix seizcin, daxboh cawx duz vaizdaeg ndeu dauqma. Duzvaiz ndang hungsang, daengx ndang ndaemndat, bizbwdbwd, doiq gaeu gozngwtngwt cap youq aen gyaeuj song mbiengj. Gij yienghceij de rengz lai lo.

Duz vaiz neix ak raixcaix. Gou baez daih’it bae langhvaiz, ngamq daj gwnz faex gej cag roengzdaeuj, duzvaiz sawqmwh dawz gyaeuj baez ngaem, ga laeng baez daemh, aen ndaeng “fw”sing ndeu, yiengq gou cung gvaqdaeuj, gou lau ndaej lienzmuengz gveng diuz cag couh buet, gou itmienh daej itmienh hemq:“Daxboh vaiq di daeuj ha, duzvaiz daemj gou la!”Gou gaemz heiq ndeu buet bae gig gyae, caeklaiq duzvaiz mbouj gyaep daeuj. Geijlai yungyiemj ha! Daeggo dingqnyi le ganj daeuj, hozndat naeuz:“Mbei lwgnyaek, mbouj raen gvaq, yawj gou!” Daeggo itmienh gangj itmienh bae gaem cag duzvaiz, duzvaiz gojyienz dingqvah dwk gaen daeggo byaij. Gou mbouj fugheiq, gaen youq baihlaeng byaij, caj yawj“heiq ndei”.

Seizneix, dangnaj byaij daeuj duz vaizlaux ranz Lungzseiq, duzvaiz ranz gou byaengq lwgda hung, ngaem gyaeuj yiengq vaizlaux cung bae, vaizlaux mbouj vueng mbouj muengz ngaem gyaeuj, song duz vaiz gaeu doiq gaeu daemj hwnjdaeuj lo, duz lawz hix mbouj fug duz lawz. Doeklaeng, vaizlaux doiqlaeng, duzvaiz ranz gou sikhaek gyaep hwnjbae, buek dai goed vaizlaux. Daeggo ngeng ndang dwk buekmingh rag diuz cagvaiz, diuz cag haen dawz aen ndaeng vaiz beng mbeuj lo. Sawqmwh, duzvaiz ranz gou gaeu baihswix baez ngeng, cig coh vaizlaux goed bae, hix dawz daeggo rag laemx gwnz namh bak saeg namh lo. Daeggo haujlai nanz cij naengh hwnjdaeuj, de yungh fwngz lumhlumh caekhaex hemqlanglang.

Daxboh daeuj lo. De hozndat ndaej nyinzhoz bongzbwdbwd, sikhaek dawz duzvaiz cug youq laj faex hung ndaetndaet bae, yienzhaeuh ndaw fwngz yaengx diuz bienneuz, laebdaeb fat caekhaex duzvaiz cib lai bien, duzvaiz bwnda yaep song sam baez, raemxda ndikbyoegbyoeg roengzdaeuj, gakbak mauh ok raemxmyaiz hausagsag. De ngeng da yawj gou mbat he, lumjbaenz gangj:“Bouxcawj iq, gouqgouq gou ba.”Raen gou lwngqlwngq yawj de, youh haenqrengz caengz gou da ndeu, gou sim siengj, de itdingh haemz gou lo.

Duz vaiz neix beizheiq mbouj ndei, hoeng dajcae guhhong yienghyeingh ndaej. Ngoenz daihngeih, daxboh yien de bae daengz henz naz, hawj de cang ek, bienvaiz yaengx youq gyang mbwn, cae couh beng bae lo. Namhnaz ndaemndatndat lumj haijlangh ityiengh youq baihlaeng duzvaiz fandoengh, mbouj geij nanz, moux naz ndeu couh cae sat lo.

Gyanghaemh, gou cang mbei hung soengq nywjheu bae hawj duzvaiz, de gamjdoengh dwk yawj gou da ndeu, couh gaemz hung gaemz hung dwk gwn hwnjdaeuj. Gou aeu sauqbaet daeuj dawz ndang de sauq ndaej luemjyubyub, youh bekbek ndang de naeuz:“Vaiz ndei, gaej daemj vunz, lai cae naz, gou ngoenzngoenz soengq ndeigwn hawj mwngz.” Seizneix, de ngiengx gyaeuj hwnjdaeuj, ndaw ndaeng boq heiq fofo, diuzrieng baet bae baet dauq, gij yiengh angq raixcaix, gou rox ndaej de gyaez gou lo.

(指导老师:覃珍团)