Bouxlaux aenvih bi’ndwen ciemh ngoenz ciemh geq, ndok hix yied daeuj yied soeng byoiq. Bouxlaux baenzlawz yawhfuengz ndok raek ne? Raeuz aeu rox, gai caeuq aenndang soemjndaengq doxdaengh miz maedsaed gvanhaeh. Mwh gwn haeuj danbwzciz daiq lai seiz, aenndang soemjndaengq couh mbouj doxdaengh lo, gai deng baiz ok rog ndang daeuj couh lai. Danghnaeuz lai gwn di byaekbohcai ndeu, couh ndaej cungfaen bouj gai caeuq meij hawj aenndang, bangcoh veizciz soemj- ndaengq doxdaengh, gai couh siuj baiz ok rog ndang daeuj, doiq goetndok gengangh cibfaen miz ik.

Veizswnghsu K ndaw byaekbohcai ndaej coi goetndok habbaenz geng- ndongj. Veizswnghsu K cujyau youq ndaw gij byaek mbaw heu caeuq ndaw youzdoenghgo. Byaekbohcai dwg doengh cungj byaekheu hamz veizswnghsu K ceiq lai ndawde cungj ndeu. Mehmbwk cungnienz caeuq mehmbwk geq moix ngoenz gwn haeuj 109 veizgwz veizswnghsu K doxhwnj, ndaej hawj fatseng ndok raek doekdaemq 30%. Hix miz yenzgiu byaujmingz, moix ngoenz gwn haeuj 200 veizgwz veizswnghsu K, couh ndaej hawj goetndok maj ndaej engq deih engq saed. Hix couhdwg naeuz, moix ngoenz gwn mbouj daengz 100 gwz byaekbohcai, couh ndaej dabdaengz aen yaugoj neix.