Ngoenzneix gyanghaet, daeng- ngoenz daxgoeng loh ok fajnaj riunyumj haujlai nanz mbouj raen haenx lo. Dadui fujdaujyenz gangj: Ngoenzneix banringz gawjhengz daengx hagdangz diuqcag bijsai. Gou dingqnyi le, gig gikdoengh, aenvih gou gaenq lienh haemz lienh hoj haujlai nanz lo, ngoenzneix dauqdaej ndaej loh dinfwngz lo.

Banringz ciet goq daihseiq, bijsai yaek hainduj lo, gyoengq doengzhag cungj youq cauhcangz lienh diuq. Lauxsae anbaiz ndei ciengzdeih le, bijsai caencingq hainduj lo. Lauxsae diemj daengz mingz gou, gou gaem ndei diuzcag sikhaek daengz dieg ndwn ndei. Gou ndaw sim gig gaenjcieng, angjfwngz cungj ok hanh lo. Seizneix, Cinz lauxsae byaij gvaqdaeuj doiq gou naeuz: “Gaej gaenjcieng, cuengqsoeng bae diuq, mwngz itdingh ndaej!”“Be”sing lwggae baez yiengj, gou couh vaiqvet diuq hwnjdaeuj, daihgaiq gvaqbae buenq faen cung le, ga gou couh nanq lo, gou hainduj diuq menh roengzdaeuj lo. Cingq youq seizneix, gyoengq doengzhag caeuq lauxsae singhung hemq: “Veiz Feihyangz——gyayouz! Veiz Feihyangz——gyayouz!”Dingqnyi gyoengqde haenqrengz vih gou gyayouz, gou youh miz rengz lo, sim siengj, mbouj ndaej hawj daihgya saetmuengh. Gou ndaw sim hix vih swhgeij gyayouz. Gou maenj bak haeb heuj, bi diuzcag gig vaiq……

“Be”sing lwggae yiengj lo, seizgan daengz lo. Gou diuq ndaej 137 baez, baizmingz daih’it. Gou sim’angq raixcaix! Cinz lauxsae gikdoengh dwk umj gou hwnjdaeuj, gyoengq doengzhag hix humx gvaqdaeuj cukhoh gou. Gwnz cauhcangz sikhaek bienqbaenz haijyangz angqvau lo.

Gou maqmuengh swhgeij youq gwnz yozsiz hix ndaej daih’it, engq maqmuengh swhgeij baezlaeng mboujguenj bungz daengz gijmaz gunnanz, cungj naengz bongh baenaj.（指导老师：韦珍兰）