Bohmeh baenzbi cungj youq baihrog dajgoeng，gou caeuq daxbuz itheij swnghhoz．

Haemhneix，gou guh cozyez sat le，cingq siengj bae yawj densi，sawqmwh yawjraen daxbuz daj baihrog byaij haeujma，diuz hwet ndwn mbouj ndaej soh．Daxbuz bingzseiz guhhong gig dwgrengz，moix ngoenz cungj nyaengq dangq- maz，caiqgya de nienzgeij laux lo，aiq dwg hwet de youh in lo. Gou wnggai bang daxbuz guh gijmaz ne？Deng lo，gou couh bang daxbuz dubhwet ba.

Gou doiq daxbuz naeuz：“Daxbuz，naengh roengzdaeuj，gou bang mwngz dubhwet.”Daxbuz naengh roengzdaeuj，riunyumnyum dwk naeuz：“Ndei， ndei， daeglan gou caen roxsoq.”Gou yaengx hwnj gaemxgienz，miz cezcou dwk bang daxbuz dubhwet．Gou nyinhcaen dub dwk，sim siengj：Gou gawq mbouj ndaej daiq yungh rengz，youh mbouj ndaej daiq mbaeu，wnggai mbouj mbaeu mbouj naek，cij miz yaugoj．Gvaq yaephe，gou cam daxbuz：“Daxbuz，yienghneix dub baenz lwi?”“Mbouj loek， mbouj loek, cwxcaih raixcaix.”Daxbuz habhoz dwk naeuz．Dingq gij vah haenh daxbuz，gou dub ndaej engq miz rengz lo．Menhmenh dwk，song fwngz gou naet raixcaix，suzdu cugciemh menh roengzdaeuj lo．Daxbuz gvensim dwk cam：“Mwngz naet loba？Daxbuz cwxcaih lo，mwngz yietnaiq yaephe.”Gou daj hwnj cingsaenz naeuz：“Mbouj naet，mbouj naet.”Itmienh gangj itmienh roengzrengz dub．Gij nyaeuq gwnz naj daxbuz mbehai lo，yawj hwnjdaeuj bienq oiq lo.

Gvaq le yaephe，daxbuz mbouj hawj gou dub lo，de sim’in dwk naeuz：“Naet loba，daxbuz rox mwngz fwngz naet lo， daeuj，ing daxbuz yietnaiq yaephe. ”

Gou ing youq ndaw rungj daxbuz，couhcinj fwngz miz di naet，hoeng gamjdaengz angqyangz fouz- beij.

Baezlaeng，gou ngoenzngoenz bang daxbuz dubhwet.

(指导老师：潘文清)