Ndang sang, byoem raez, da hung, lij daiq fouq nganxciuq ndeu, daengx ngoenz cungj riunyumnyum, de couh dwg lauxsae gou——Vangz lauxsae.

Miz ngoenz ndeu, cuengqhag ngaiz lo, gou caeuq geij boux doengzdoih youq gwnzroen guhcaemz, dauqma ranz ceiz lo. Daxmeh gig ndatheiq, couh moeb gou, ndaq gou, lij fad gou mbouj hawj gou gwn haeuxngaiz. Banringz hwnjdangz seiz, gou dungxiek lo, mboujmiz banhfap dingq lauxsae gangjgoq. Gou mboujmiz saekdi cingsaenz boemz youq gwnz daiz. Vangz lauxsae itmienh gangjgoq, itmienh byaij daengz baihnaj gou, gou gig lau, ndawsim gou diuqbaegbaeg, lau lauxsae ndaq gou. Byawz rox, lauxsae mboujdanh mbouj ndaq gou, lij aeu fwngz de lumhlumh gyaeuj gou, cam gou baenzlawz ha? Dwg mdouj dwg baenzbingh? Gou dawz saehcingz daj goek daengz rieng lwnh hawj de, roengzdangz lo, Vangz lauxsae heuh gou bae daengz bangunghsiz de, yienzhaeuh de buet daengz siujmaibu cawx menbauh hawj gou gwn, lij ndingq raemxcaz hawj gou. Yawjraen Vangz lauxsae yienghneix gvensim gou, raemxda gou doek roengzdauj lo. Doeklaeng, Vangz lauxsae lij daegdaengq ra gou, gangj liux haujlai dauhleix hawj gou. Gou roxnyinh daengz gienh saeh neix dwg gou loek lo. Dauqma ranz, gou yiengq daxmeh nyinhloek, daxmeh riu lo, lij haenh gou dwg boux lwgnyez ndei rox loek couh gai.

Seizneix, gou ciemhciemh majhung lo, dwg boux lwgnyez vunz raen vunz gyaez. Neix caeuq Vangz lauxsae doiq gou gyauyuz faen mbouj hai, sojyij gou aeu naeuz: Vangz lauxsae, docih mwngz!(指导老师：李金帅)