□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Yienh Vujmingz liz Namzningz cij miz 40 goengleix gyae, naengh ciiq mbouj yungh buenq diemjcung cix daengz lo. Veiz Gozcingh bae Vujmingz gaenq haujlai baez gvaq, yenveij haujlai ganbu cungj caeuq de doxsug. De daeuj gizneix gwn haeux, it mbouj hawj yenveij buenx gwn, ngeih mboujcinj gaj bit gaj gaeq. Bouxdajcawj Lauxleiz ceiq rox de maij gwn gijmaz, couhdwg vanj dangdouhfouh, deb byaekheu ceuj nohmou, vanj haeux roxnaeuz deb faenjceuj ndeu, gijneix cix habhoz de lo, guh lai le haengjdingh deng de bihbingz. De gwn imq le cungj rox haenh Lauxleiz guh byaek ndei gwn lai, caemhcaiq daengq gij lajfwngz henzndang de naeuz gaej lumz gyau ngaenz caeuq biuqhaeux.

Banhaemh, yenveij suhgi Ciz Fazsiengz guh veibau hawj de le, de daegbied daengqnaeuz: “Lauxciz ha, seizneix seiz haemzhoj, ngoenzcog gou bae Gunghse Hawlab diuhcaz, youq gunghse youq gwn, gyoengqde gwn gijmaz dou cix gwn gijmaz, gaej loengh gijmaz noh daeuj gwn, gaej daegbied ciuqgoq dou.”

Youq Hawlab diuhcaz ndaej aen singhgiz, de caeuq gij ganbu gunghse doxdoengz, youq ranzngaiz gwn haeux, ngoenz gwn song donq, donq gwn cung ngaiz, deb byaekheu caeuq geij naed duhnamh.

(caengz sat)