烟雨纷纷又清明

“Seizciet cingmingz fwn foenx- foenx, vunz byaij gwnz roen yaek saethoenz.” Seizciet cingmingz, cungj dwg fwnmoenq foenxfoenx, mbouj dingz mbouj duenh, mok laep moengzloengz, nanz ndaej raen mbwn’gvengq ronghseuq. Cuengq da muengh bae, rog mbanj ndaw rungh, gwnz ndoi laj doengh, fwj mok doxgyaux, gizgiz laepngaungau, yienghyiengh mumjgyumqgyumq; cengj da cimyawj, ndaw ranz rog hongh, bangx ciengz gwnz dieg, fwn rumz doxgyonj, mbin fouz foenxfoenx, hoengheiq daengz gizlawz fwn couh youz daengz gizlawz, raen maz yinh maz, deng maz bwd maz, gwnz laj bwdbangbang, ndaw rog dumzsubsub. Aen seizciet moengzloengz mwtngau neix, lauheiq hix dawz aensim vunz cumx bwd、yinhdumz、bienq naek luba? Mboujnex, baenzlawz miz dingzlai vunz yawj yiengh naemj vunz, siengj saeh ngeix gaeuq, naj mizdi saep, sim mizdi naek ne? Ndigah, gyoengqvunz siengj saehgonq niemh boux gvaqseiq, couh bae ganq moh baiq goeng, dakgeiq gij simcingz swhgeij lo.

Hoeng, vunz gwj ciengz gangj: “Lwgnyez mbouj rox couz feihdauh, ngoenz gwn hwnz ninz cij rox nauh.” Moix daengz cingmingz bae rog baiqgoeng, bouxcoz、lwgnyez couh mbouj lumj bouxlaux lo. Gyoengqde yawjraen seizcin dauqma, doenghgo dauq maj, doenghduz dauq nauh, youq rog gizgiz va hom roeg heuh, dingzlai mbouj gamjsouh daengz gij simcingz bouxlaux naemj vunz you sim ne. Gyoengqde gangjnaeuz daeuj rog baiqgoeng, mboujyawz gangj dwg daeuj youz ndoi cet rungh guhcaemz ne, cungj siengj youq rog ra gij saensien angqmaengx, ra gij yinxdaeuz guhcaemz ne.

Geiq ndaej seiziq daxboh daiq dou fan ndoi gvaq rungh bae baiqgoeng, loh geijlai gyae, vunz geijlai sinhoj, dou hix mbouj lau, cungj angqvauvau ceng bae. Dou dauq mbouj rox baiqgoeng dwg baenzlawz geiqniemh bouxlaux, baenzlawz youqgaenj, cij rox youq rog ndei guhcaemz, ndaw rungh gwnz ndoi dauqcawq cungj dwg gij doenghyiengh mizyinx haenx. youq gwnz loh, dou cungj haengj doeng yaek sae yawj, buetbuet dingzdingz, mbaet va guhcaemz, ciengj makndoi gwn. Dingqnyi duzroeg heuh ndei dingq, couh doeng muengh sae yawj, dingz din dingq ndaej ngaezngwd; yawjraen duzroeg mbin hwnj, faex cangh rum doengh, couh maengx swenj angq heuh, siengj bae gaeb, roxnaeuz gip ndaek rin daeuj gaeuh duzroeg, hix mboujguenj daxboh baenzlawz coi byaij vaiq di. Danghnaeuz lohgvaq henz ndoeng cazceij, dou haengjdingh buet haeuj ndoeng cazceij bae ra roetcazceij gwn. Seizneix, daxboh cix naihsim ndwn youq henzloh, riu- nyumnyum yawj dou ceng mbaet roetcazceij gwn.

Hix geiq ndaej, seizcoz daiq daeglwg caeuq daxboh daeuj baiq- goeng, raen henzloh miz va’ndoi mak- ndoi, sim’angq raixcaix, swnh fwngz mbaet hawj daeglwg, lij mbaet ndaej byaek ndoi dauqma, benz daengz gwnz gemh soeng heiq, yawjraen benq dieg gizgyae bienq ndaej daemqdetdet gvangqmyangmyang, funghgingj gyaeundei, sim sangjswtswt, lij nyaenx mbouj ndaej siengj swenjhemq geij sing, dingq bya hoiz yiengj, cadi mbouj geiq ndaej swhgeij gaenq baenz boux daxmeh lo. (caengz sat)