□Fangh Swlunz/方仕伦

(ciep geiz gonq)

Sai: Danh ndaej mwngz nuengx daeuj han bak,

Raeuz bae Yiemhmak gou langh(cuengq) sim;

Roegmeh daiq gonq roegboux mbin,

Raemx lae ok linz haeuj dah gvangq.

Mwngz naeuz hauhlawz gou couh riengz,

Gou hix goj siengj bang mwngz rap;

Danh ndaej mwngz nuengx daeuj han bak,

Raeuz bae Yiemhmak gou langh(cuengq) sim.

Hwnj daengz gwnz ndoi mwngz yietnaiq,

Gou din fwngz raih bang nuengxgim;

Roegmeh daiq gonq roegboux mbin,

Raemx lae ok linz haeuj dah gvangq.

Mbwk: Gangj baih gvej haz gou lij vaiq,

Mwngz bae yietnaiq gou dingj song;

Bienh cog bae ranz mwngz guh hong,

Yawj nuengx goengfou habgek mbouj.

Mwngz bae ra lamh daeuj cug haz,

Song honj(gonz) caezgya gyoeb rap daih,

Gangj baih gvej haz gou lij vaiq,

Mwngz bae yietnaiq gou dingj song.

Ngoenzneix gou doiq naj mwngz auq,

Ngoenzlaeng raeuz dauq rox guh rongz；

Bienh cog bae ranz mwngz guh hong,

Yawj nuengx goengfou habgek mbouj.

Sai: Mwngz nuengx doiq gou caen baenzcingz,

Song fwngz mbouj dingz cauh fukfaenh;

Gya liu coq feiz feiz cix haenq,

Song raeuz gungh baenq aen loek ndeu.

Lamh raez cug haz guh goenjlaux,

Ringx roengz laj ngaux(ndoi) daengz diegbingz;

Mwngz nuengx doiq gou caen baenzcingz,

Song fwngz mbouj dingz cauh fukfaenh;

Mwngz gou caezsim daeuj gvej haz,

Ngoenzcog raeuz ma doengz fid faenq(bwnh);

Gya liu coq feiz feiz cix haenq,

Song raeuz gungh baenq aen loek ndeu.

Mbwk: Mwngz go cawjeiq saedcaih ndei,

Hawj haz gag “lae” daengz laj doengh,

Caemh mwngz guhdoih mbouj lau nyoengq,

Hawj gou gikdoengh baenz gijmaz.

Coengmingz yiengh mboq cungj mbouj haep,

Couh lumj haemhlaep raen gaem feiz,

Mwngz go cawjeiq saedsaeh ndei,

Hawj haz gag “lae” daengz laj doengh.

Bouxvunz simsoh vah baenz diuz,

Aennaj cungj riu lwgda rongh；

Caemh mwngz guhdoih mbouj lau nyoengq,

Hawj gou gikdoengh baenz gijmaz.

Sai: Neix raeuz rap haz dauqma ranz,

Gwnz mbaq diuzhanz saenqdaenhdaenh；

Naeuz nuengx byaij roen dieb din maenh,

Raeuz yamq doxdaengh mbouj lau byanj.

Ngoenzneix aeu haz caen ndeiangq,

Caemh mwngz gungh yamq mbouj maz lanz;

Neix raeuz rap haz dauqma ranz,

Gwnz mbaq diuzhanz saenqdaenhdaenh.

Ngoenzlaeng ok dou bae guhhong,

Baqmuengh baenz song boux doxdaengh;

Naeuz nuengx byaij roen dieb din maenh,

Raeuz yamq doxdaengh mbouj lau byanj.

Mbwk: Caemh go rap haz dauq baema,

Song raeuz caezgya sim angqyangz;

Fajdin doengz byaij sim doxrangh,

Gungh aen doudangq ngoenzlaeng raeuz.

Guhdoih haeuj rungz song duz hanq,

Mboujmiz bit camq(cab) cix baenz gya;

Caemh go rap haz dauq baema,

Song raeuz caezgya sim angqyangz.

Rap haz gwnz mbaq fwngz cix bei (bi) ,

Vunz bungz saeh ndei cix roxangq;

Fajdin doengz byaij sim doxrangh,

Gungh aen doudangq ngoenzlaeng raeuz.

(sat)