“Lingling” lingz cuengqhag yiengj lo, gyoengq doengzhag lumj raemxrongz nei lizhai yozyau, seizneix, ndaw yozyau bienq ndaej caemlwglwg. Youq ndaw gyausiz caemlwglwg neix, dwg mbouj dwg mboujmiz saek di singyaem ne？Mbouj dwg, sou dingq, ndaw gyausiz sam (1) ban cingq gangj vah laeglemx ne!

Rumzbaek cihuhu, ci ndaej aen cueng bohliz yiengj mbouj dingz. Sawqmwh, mbouj siujsim, dawz sam (1) ban aen daiz ndeu dongj fan bae lo, de nyaenx mbouj ndaej swenj hwnjdaeuj.

Hwzbanj nyaengq ngoenz ndeu le, cingq ninzndaek, sawqmwh fwt singj gvaqdaeuj, de cam：“Mwngz guh gijmaz ha, daiz daegnuengx？”Aen daiz dingj in dwk naeuz：“Cungj dwg bouxcawj gou mbouj roxsoq, de baenz ngoenz cungj ngauz gou, youq gwnz ndang gou dub bae dub dauq, hawj gou ndaeng fod naj foeg liux. Mwngz yawj, di lumz neix couh ci gou laemx bae lo.”Gangj dwk youh nyaenx mbouj ndaej swenj aeyo aeyo hwnjdaeuj lo.

Seizneix, baengzyoux de——Aen eij hix gangj vah hwnjdaeuj：“Dwg ha, bouxcawj mbouj roxsoq, baenzngoenz cungj hangz raeuz. De ciengzseiz youq gwnz ndang gou caij bae caij dauq, diuq hwnj diuq roengz, naengh youq gwnz ndang gou, enj aek enj ai, soqlai mbouj hawj gou seiq cik ga doengzseiz bungz namh，gij gvanhcez gou soeng lo, de hix mbouj bang gou niuj gaenj bae.”Gangj dwk, rumz ci aen eij youh yiengj hwnjdaeuj lo.

Seizneix, daihseiq cuj aen daiz ndeu hix daej hwnjdaeuj lo.

Daihgya cam：“Dou nanzgvaq, mwngz daej gijmaz？”

De naeuz：“Gaej gangj lo, saedceij gou yaek gatsat lo.”

“Vih gijmaz ne？”Caezgya cungj geizheih dwk cam.

De naeuz：“Aenvih bouxcawj gou itdingh dawz gou loengh baenz ga’gvez、najraiz cij dingz, bouxcawj gou baez daengz gaujsi, couh aeu bit youq gwnz naj gou sij、veh, hawj naj gou cungj raiz liux. Lij aeu mid youq naj gou gaek cih, naj gou raiz liux lo.”Gangj sat youh daej hwnjdaeuj.

“Dingq, dwg gijmaz singyaem？”Caezgya muengh bae, yenzlaiz dwg aen daiz daihngeih cuj daihhaj hangz cingq ciengqgo. Caezgya youh cam：“Caezgya cungj siengsim, mwngz vih gijmaz baenzneix angq？”

De naeuz：“Mbouj dwg moix boux doengzhag cungj yienghneix guh, sou yawj, bouxcawj gou couh ciuqgoq gou gig ndei, ngoenznaengz daeuj le, couh aeu soujgaen uet gij faenz gwnz ndang gou, baij gou cingq le cij okbae hozdung. Danghnaeuz genga gou soeng le, de bang gou niuj maenh bae, caeuq sou beij, gou vuenyungz raixcaix lo！”

Rumz dingz lo, gyoengqde hix mbouj gangj vah lo, ninz ndaek lo.

（指导老师：覃仲南）