Saucin daeuj lo, de dawz raeujrub daiq daeuj. Gwnz biengz longz hwnj buh heu; fwncin “sasa” dwk doek hwnjdaeuj, va’iq、faexlwg caeuq doenghnaz cungj “gulu gulu” dwk ndoet gaeuq bae；duzgoep ninz singj lo, “gva’gva’gva” heuh mbouj dingz, lumj naeuz：“Caen ndei lo, seizcin daeuj lo.” Yawj, geij duz vaizmeh caeuq vaizlwg youq benq nywj doiqmienh gwn nywj, duz vaizmeh “momomo” heuh dwk, lumj naeuz: “Gij nywj gizneix ndeigwn raixcaix, gyoengqdoih vaiq gvaqdaeuj ha!”

Dahcej seizhah daeuj lo, de dawz ndithaenq daiq daeuj, gwnzbiengz hwngq lo. Duzbid gwnz faex yaep he couh rox heuh “nye’nye”.

Daxheih seizcou daeuj lo, de dawz rumzliengz daiq daeuj. Gwnz faexhung henz roen, mbawfaex henj lo, raq rumz iq ci daeuj, mbawfaex “sasa” daj gwnz faex loenq roengzdaeuj, cw hoemq daihdeih.

Daxgoeng seizdoeng daeuj lo, de dawz gij nit daiq daeuj. Rumzbaek “huhu” dwk bongj gvaq byaifaex, gij nonhaih ndaw doengh saenzdedded, lumj naeuz: “Seizdoeng caen nit, raeuz yaek souh mbouj ndaej lo.” Mbwn baenz nit, hoeng bouxsauqgai ciuqyiengh mbouj yietbaeg, sauq gai fat ok gij sing “sasasa”. Dwg gij gaenx gyoengqde vuenh daeuj gij seuq ngoenzneix.

A, biengz raeuz daengxbi seiqgeiq gingjsaek mbouj doengz, gingj gyaeu vunz ndei, baenzlawz mbouj hawj vunz simmaez ne? （指导老师：黄雪丽）