□Fangh Swlunz/方仕伦

(ciep geiz gonq)

Sai: Raeuz doengzgungh bae gvej hazriengh,

Caez bae Gwnzyiemh rox Bo’nyouz;

Neix raeuz byaij daengz Laengcazyouz,

Mwngz gangj hawj gou vang gyawz mienh.

Song duz roeglaej bae hamz fiengz,

Guh rongz bangxciengz sim doxlienh;

Raeuz doengzgungh bae gvej hazriengh,

Caez bae Gwnzyiemh rox Bo’ nyouz.

Raemxdah cix baenz lai ngadah,

Lohsamca baq lai bak dou;

Neix raeuz byaij daengz Laengcazyouz,

Mwngz gangj hawj gou vang gyawz mienh.

Mbwk: Gwnzbangxyiemh mak haz mwn noengq,

Hojsik de lingq mbouj ndei bin;

Bo’nyouz dauqcin(caen) lai youh bingz,

Giz haenx vunz rim mbouj fuengbienh.

Byalaux cix baenz youq ndawvaengz,

Raet dok conghfaengz mbaw do ndongq;

Gwnzbangxyiemh mak haz mwn noengq,

Hojsik de lingq mbouj ndei bin.

Gienq mwngz caez bae Gwnzyiemhmak,

Gvaq daengz laeng dat raeuz cix hingz;

Bo’nyouz dauqcin(caen) lai youh bingz,

Giz haenx vunz rim mbouj fuengbienh.

Sai: Nuengx gangj Yiemhmak cix Yiemhmak,

Gou gyaez bin dat gyaez riengz mwngz;

Couh lau dieg haenx vunz bangjfwngz,

Beg bae daengz gwnz youh lingh dauq.

Raen diuz hanzhaz song gyaeuj soem,

Faggeuz daet byoem it aenbak;

Nuengx gangj Yiemhmak cix Yiemhmak,

Gou gyaez bin dat gyaez riengz mwngz.

Duzgaeq hah rungz bit mbouj ciemq,

Bya’ndok hai diemq youq bakdwngj;

Couh lau dieg haenx vunz bangjfwngz,

Beg bae daengz gwnz youh lingh dauq.

Mbwk:Danghnaeuz bangjfwngz gou bangjfwngz,

Daegdingq caj mwngz guh gacuengx;

Ndit dak hoz hat(hawq) gwn lwgnduengq,

Seizbienh bae yuengq mbouj byawz naeuz.

Gofaex bangxdat aeu fwngz vax,

Fwn doek yiemhvax lae haeuj gywngz;

Danghnaeuz bangjfwngz gou bangjfwngz,

Daegdingq caj mwngz guh gacuengx.

Makit ndaem cug venj gwnz gaeu,

Yaengx fwngz bae aeu song raeuz suenq；

Ndit dak hoz hat(hawq) gwn lwgnduengq,

Seizbienh bae yuengq mbouj byawz naeuz.

(caengz sat)