私房钱

(ciep geiz gonq)

Seizneix lauj Vangz hajcib bi lo, ranz yienznaeuz hwnj ndaej lo, hoeng, yiemqcaiq lij caengz boiz sat, youh daengz seiz lwg ndei baenzgya lo. Boiz caiq、lwg gietvaen yiengh lawz cungj mbouj ndaej nguh, lauj Vangz lij caengz ndaej yietnaiq. Ndaw daeh de lij dwg hoengqbebbeb. Nanzgvaiq de ciengz naeuz de dwg “mingh duzvaiz”.

Bingh daeuj lumj bya lak. Miz ngoenz ndeu, lauj Vangz bingh lo, youq ndaw yienh yihyen louzyih. Mehyah bae guenj de song ngoenz song hwnz, loengh dwk song buengzda ndaem liux lo, lauj Vangz yawj le sim in lai. Haemh daihsam, lauj Vangz yaek ninz seiz doiq mehyah naeuz：“Seizneix mbouj miz ci bae daengz ranzmbanj lo, mwngz dap cigungh- gyauh bae ndaw cin danhvei ranz gou ninz ba, mboujnex ndang doemq le baenzlawz guh?” Gangj sat couh ndenq linxsaj hawj mehyah.

Mehyah haujlai bi mbouj daengz aenfuengz lauj Vangz lo. Aenvih lauj Vangz bingzseiz dwg haet bae haemh dauq, de mwh ringz yietnaiq cij youq aenfuengz neix, mehyah engqgya mbouj daeuj youq.

Mehyah byaij haeuj ndaw fuengz, raen gwnz daengq gwnz mbonq foenx nanwtnwt, de dinfwngz riengj dwk sousib hwnjdaeuj.

Mehyah hai aen doengjgvih he, geij bonj yungzyi cwngsuh nding- fwdfwd lauj Vangz haenx ingj haeuj lwgda de, mehyah caeg riu hwnjdaeuj. Sawqmwh, mehyah raen dab feigeiq- cienz he, de caen miz di mbouj saenq fouqda swhgeij, de geq dabfei mbat ndeu, miz sam cib lai mbaw, sam mbaw 500 maenz, roek mbaw 300 maenz, gizyawz mbaw 200 maenz. Mbwn ha, gij cienz neix de geiq hawj bouxlawz ni? De daj gizlawz ndaej gij cienz neix ni? Goenggeq daigaj neix, gingqyienz laeglemx rom cienzrei, cax raemj de bw! Mehyah hozndat ndaej mbei yaek dek bae, huj dwk naj nding rwz oq, fwngz miz di saenz, de youh laebdaeb fanra ndaw doengjgvih.Youq ndaw lingh aen doengjgvih he, de raen dab saenq he, dawz fung ndeu daeuj yawj: Vangz bohlungz, mwngz ndei, mwngz geiq cienz daeuj gou sou ndaej lo, docih mwngz gvansim gou……

Mehyah raemxda ciuz ngvih lo, yawj mbouj cingcuj lo……Saenq dwg boux hagseng siujyoz heuhguh Siujveih he daj Swconh Swngj Menzyangz Si Feisiuj Cin geiq daeuj. Mehyah caiq sijsaeq yawj gij feigeiq- ngaenz haenx, raen moix ndwen cungj miz mbaw ndeu.

Ngoenz daihngeih, mehyah dawz geij mbaw feigeiqngaenz caeuq geij fung saenq bae yihyen. Mwh de youq dangqnaj lauj Vangz cuengq gij doxgaiq neix seiz, lauj Vangz doeksaet liux, yaep he, de riuhehe naeuz: “Hong baujmiz gou guh mbouj ndaej ndei geijlai, deng ‘dwzvu’fatyienh lo.” Lauj Vangz youh ngauzngauz gyaeuj naeuz：“Siujveih dwg boux lwggyax deihdoengh seiz louz roengz- daeuj ndeu, hojlienz dangqmaz, mehyah, mwngz mbouj huj ho?”

“Gij cienz neix daj gizlawz daeuj?” Mehyah cam.

Lauj Vangz naeuz: “Gou youq seiz banngoenz yietnaiq aeu cimohdoz bae dap hek；mwh hong reihnaz hoengq seiz, miz mbangj ngoenz singhgiz gou yaeuh mwngz naeuz danhvei gyahbanh, gizsaed gou dwg bae dap hek.”

Dingq daengz neix, mehyah rox- nyinh aen ndaeng soemjswdswd, naeuz: “Mwngz ha, mwngz……”

Gvaq le geij ngoenz, mehyah dawz gunghswhgaj hawj dauq lauj Vangz. Lauj Vangz dauqfanj mbouj eiqseiq lo, naeuz：“Lij dwg mwngz dawz ba, gou gvaq ndaej bae.” Mehyah miz di gip，naeuz：“Hawj mwngz mwngz couh aeu vei, lij lawq gijmaz?” Lauj Vangz yawjyawj mehyah, riunyumj hwnjdaeuj ……(sat)