□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Cungj bingzyaenx cujyi swngh- canjdui caeuq swnghcanjdui doxmiz haenx ndaej gaijgez le, doiq guh nungzyez swnghcanj miz coicaenh gig daih. Hoeng, swnghcanjdui ndawde seyenz caeuq seyenz miz cungj bingzyaenx cujyi haenx haemq youqgaenj, aen vwndiz neix mbouj ndaej gaijgez seuq bae, cix mbouj ndaej cungfaen diuhdoengh vunzlai haengjheiq bae guh hong.

Veiz Gozcingh caeuq gij doengzsaeh de youh hainduj bae damqra aen vwndiz neix lo.

“Yaujgvangh, mwngz youq dieg raeuz dwg boux nungzyez conhgyah ndeu, mwngz yawj aen vwndiz neix baenzlawz cix ndaej guh ndei ne?” Gyauz Yaujgvangh dauqma Guengj- sae guh hong le, Veiz Gozcingh lai baez cam de gij cingzgvang Cauzsenj hwnqguh sevei cujyi haenx, caemh- caiq doxgangj doxyaeng Guengjsae baenzlawz guh hong sevei cujyi.

“Gou suenq gijmaz conhgyah, gangj daengz guh dujgaij gou lij gangj ndaej di vah he, ngamq haidaeuz guh hozcozva gou cix deuz bae guekrog lo, guh hong nungzyez gou noix sizcenj ha, nanz gangj ok dauhleix daeuj.” Gyauz Yaujgvangh soqlaiz gangjvah haeujsim raixcaix, de mbouj diucaz ngeixyaeng gvaq ne cix mbouj luenh gangj vah.

Geij boux suhgi cungj nyinh- naeuz, vih gaijgez youq ndaw swnghcanjdui vunz caeuq vunz miz cungj bingzyaenx cujyi aen vwndiz neix, cix aeu haeujlaeg damqra swnghcanjdui baenzlawz ginghyingz caeuq guh guenjleix.

Bi 1962 ndwen 7 ndawcib, Veiz Gozcingh youh daengz Vujmingz Yen baez dem. (caengz sat)