Gwn gij yw yw dungxin、yw baenzae、yw conghhoz in seiz, wng caenhliengh siuj gwn raemx. Danghnaeuz siengj gwn raemx, wng youq mwh gwn yw gvaq buenq diemj cung doeklaeng, caj baujhumoz onjdingh roxnaeuz dabdaengz gij yw cozyung seizgan caiq gwn di raemx ndeu.

Mbangj yw mwh gwn de seiz mboujdanh mbouj ndaej gwn raemx lai, caemhcaiq mbouj ndaej gwn raemx, mboujnex ywyauq rox doekdaemq, yw mbouj ndei bingh.

Ndigah, mwh gwn yw yw dungxin seiz, cijdan gwn di raemx he soengq yw roengz dungx couh ndaej, mbouj hab gwn raemx lai. Mbangj yw ndaej cigciep nyaij gwn, mbouj yungh raemx soengq. Gwn yw gaxgonq aeu yawj ndei sawsozmingz caiq gwn.

Caiq lumj cijgwzdangzcangh、ganhcauj hozci daengj, gij yw neix haemq gwd, gwn roengzbae rox nem youq ndaw conghhoz, cigciep cozyung youq giz binghbienq haenx hwnj daengz siu in cozyung. Danghnaeuz gwn raemx daiq lai, rox heuz saw gij mizyauq cwngzfwn ndaw conghhoz, ywyauq couh doekdaemq lo.