Daxgoeng gou gaenq ndaej 60 lai bi lo, naj nyaeuqnyatnyat, hoeng ndang lij gig maengh, ga hung lingzvued, byaij loh hwnjdaeuj yiengj “dungdung”. Geij bi neix, vunz mbanjranz saedceij gvaq ndaej lumj lwgraz haiva—hohhoh sang. Hoeng daxgoeng lij mbouj youq- hoengq. De youq ndaw reih naj ranz laeng ranz ndaem rim byaek, lij ciengzciengz dawz daengz gwnz cin bae gai.

Gou youq ndaw cin doegsaw, mbouj gingciengz dauq ranzgaeuq, hoeng ciengzseiz dingq daxboh daxmeh gangj:“Daxboh caen hix dwg, nienzgeij baenzneix geq, mbouj you gwn mbouj you daenj, lij nyaengq dwk mbouj dingz……”

Bi’gvaq sujgyaj, gou dauqbae ranz daxgoeng youq guhcaemz. Banhaemh, gou yawjraen daxgoeng rap rap byaek ndeu dauqma, sawqmwh gietdingh, ngoenzcog aeu caeuq daxgoeng itheij bae gai byaek, hoeng mbouj naeuz hawj daxgoeng rox, cij naeuz hawj daegnuengx rox, hawj de caeuq gou itheij bae, daegnuengx dapwngq lo.

Ngoenz daihngeih, mbwn ngamq yaek rongh, gou caeuq daegnuengx laeglemx hwnq lo. Diem din diem fwngz hai dou rug daxgoeng, cijraen daxbuz gag ninz gwnz mbonq. Gou caeuq daeg- nuengx laihnaeuz daxgoeng lij youq gyanghongh guh gijmaz, ngamq doi hai dou, couh dingqnyi aen mohdozceh daxgoeng yiengj lo, gou caeuq daegnuengx vaiq buet okbae naeuz: “Daxgoeng, dou hix bae.” Daxgoeng geizheih dwk cam:“ Bae gizlawz?” “Caeuq mwngz bae gwnz haw gai byaek ya !” Daxgoeng sing hung riu naeuz:“Lwg huk, byaek gai liux lo, gou gaenq dauqma lo. Yawj gou lij daiq gij huq ndeigwn ma hawj sou ne!” “A!” Gou caeuq daegnuengx doeksaet dwk bak ajloengloeng.

Gwn sat haeuxcaeux, daxgoeng youh gwed gvak bae guh hong lo……

Daj haenx hwnj, gou dauqma daengz ranz couh gaenx lumj daxgoeng ityiengh, ciengz bang daxboh daxmeh guhhong, daxboh daxmeh cungj haenh gou gyaez guhhong lo.