Miz gienh saeh ndeu, gou ciengxlwenx lumz mbouj ndaej.

Haenx dwg gou hwnj sam nienzgaep seiz, bakdou hagdangz cungj miz haujlai dan gai saejdaeuz. Moix baez haeujok bakdou hagdangz, dingqnyi sing bouxbuenq hemqgai, yawjraen doengzhag daengx fwngz gaem rim saejdaeuz, ndaw ukgyaeuj gou naemjyebyeb.

Ngoenz he, gou swnh daxmeh mbouj youq ranz, daj ndaw daizdo de caeg 5 maenz ngaenz daeuj. “Caeg” cih neix baez daih’it yungh youq gwnz ndang gou lo, cijdwg vih cawx saejdaeuz. Cuengqhag le, gou cawx haujlai saejdaeuz, cingq byangh’aek gwn seiz, gou sim mbouj an’onj hwnjdaeuj: Danghnaeuz daxmeh fatyienh gou gwn saejdaeuz baenzlawz banh ne? Gou wnggai mbouj wnggai nyinh loek ne? Gij vwndiz neix youq ndaw uk gou cienq bae cienq dauq, gwn doxgaiq hix mbouj miz feihdauh lo.

Doxgaiq cungjsuenq gwn sat lo, gou uet bak seuq bae, baez yamq baez yamq byaij baema. Baez haeuj ranz, couh yawjraen daxmeh cingq fan ra gijmaz. Seizneix, daxmeh yawjraen gou dauqma le, couh cam:“Mwngz yawjraen 5 maenz ngaenz gou lwi? Gou ra lingzcienz bae cawx bau gyu ndeu ne!” “Mbouj, gou mbouj raen. ” Mbwn ha, gou vihmaz aeu yienghneix gangj vahgyaj ne? Gou gangj sat couh buet ma aen rug swhgeij lo.

Daengx hwnz, gou deng gienh saeh neix loengh dwk ninz mbouj onj. Henz dujrwz lumj miz song boux vunz doxceng:“Mwngz wnggai bae yiengq daxmeh nyinh loek.” “Mbouj, yienghneix deng lemh rim ndang bw.” “Byawz heuh mwngz damgwn, gag guh gag souh.” “Hoeng……”

Mbwn baez rongh, gou couh roengz gietsim bae ra daxmeh gangj cingcuj aen saeh neix. Gou laihnaeuz daxmeh rox le, itdingh lemh gou rim ndang bae. Sojyij, gou dinghdingh caj “rumzhaenq fwnraq” daeuj- daengz. Siengj mbouj daengz, daxmeh cix riunyumj doiq gou naeuz: “Guh loek saeh le, gamj gag nyinh loek, couh dwg boux lwgnyez ndei, baezlaeng mbouj ndaej caiq famh cungj loek neix lo.”

5 maenz ngaenz hawj gou bienqbaenz “bouxcaeg iq”, hoeng gou gag nyinh loek ndaej daengz daxmeh yienzliengh, ndawsim gou ndaej soeng di lo. Lumj cungj loek neix, baezlaeng gou itdingh mbouj caiq famh lo. Gienh saeh neix hawj gou rox: Bouxvunz mbouj gojnaengz mbouj famh loek. Guh loek saeh mbouj dwglau, dwglau dwg guh loek saeh le cix mbouj gamj gaijcingq gvaqdaeuj!

(指导老师：覃珍团)