Daxmeh gou soqlaiz caengz guh gvaq gij saeh hung haenx, dauq hawj gou gamjsouh daengz de gig maij gou.

Ngoenz ndeu gyanghaemh, gou mbouj siujsim najbyak deng bungz ok lwed lo. Daxmeh raen le, lienzmuengz umj gou buet bae yihyen. Gou heuh daxmeh cuengq gou roengzdaeuj, hoeng daxmeh dauq naeuz：“Mboujyungh, mbouj- yungh, yaek daengz yihyen lo!”Mbouj rox seizlawz, gou fatyienh daxmeh loh din, laj din lae ok gij doxgaiq saekhoengz, haenx dwg gijmaz ne？Gou sijsaeq baez yawj, a!Haenx dwg gij lwed daxmeh!Yenzlaiz, daxmeh sim gip lai lij caengz daenj haiz, couh umj gou buet okdaeuj lo. Gij rin gwnz loh camx din daxmeh ok lwed lo.

Miz baez ndeu langhhag seiz, sawqmwh doek fwnhung, ngoenz- haenx gou mbouj daiq liengj, cijndaej caj fwn dingz le caiq baema. Youq ndaw fwn, gou yawjraen aen ngaeuz ndeu byaij daeuj coh gou, “A！Dwg daxmeh！” Gou angq hwnjdaeuj lo. Daxmeh byaij daengz baihnaj gou, riunyumnyum dwk naeuz：“Lumz daiq liengj loba! Baezlaeng mboujndaej lujlaj lo.”Youq gwnz loh, daxmeh cungj gang liengj hawj gou, cihgeij dauq deng fwn rwed dumz lo. Yienghneix, gou doiq daxmeh naeuz：“Daxmeh, mwngz gaem liengj gang baih mwngz ba!Buhvaq mwngz cungj dumz lo!”Daxmeh unqswnh dwk naeuz：“Mboujmiz gijmaz! Neix mbouj suenq gijmaz……” Ma daengz ranz, buhvaq、byoemgyaeuj daxmeh cungj dumz lo.

Dwg ha!“Gij maij daxboh lumj bya, gij maij daxmeh lumj haij!”Gij maij daxmeh lumj haijyangz mbouj miz haenz, geijlai gvangqlangh！Geijlai raeujrub！Gij maij daxmeh couh lumj raq rumz raeujrub, menhmenh lumh faj naj gou！

（指导老师：刘海蕙）