武鸣县中桥小学三（1）班 冯得扬

Moix ngoenz hwnjdangz sat le, gou cungj gyaez camgya gak cungj hozdung, daegbied dwg lienh sijcih. Sijcih hawj gou vaiqvued fouzbeij.

Geiq ndaej daih’it ngoenz lienh sijcih, cungjdwg lienh sij mbat bitved, gig genjdanh, gou gig vaiq couh hag rox lo. Yienghneix gou couh gag nyinhnaeuz lienh sijcih daiq yungzheih lo. Byawz rox, doeklaeng yied sij yied hoj lo, miz seiz cih saw ndeu gou sij haujlai baez hix sij mbouj baenz, fwngz cungj naet liux, couh miz di doeknaiq mbouj siengj lienh lo. Daxmeh lumjnaeuz yawjok sim gou ngeix gijmaz, gujli gou naeuz:“Geij gaenj, lienh sijcih aeu menhmenh cij ndaej, daxmeh saenq mwngz itdingh lienh ndaej engq ndei.” Dingq le gij vah daxmeh, gou youh dauq miz saenqsim lo, lienh ndaej engq roengzrengz, hix sij ndaej engq gyaeundei lo.

Daj ndaw vah daxmeh gujli gou haenx, hawj gou roxdaengz le, lienh sijcih mbouj ndaej gaenj, aeu miz naihsim, menhmenh lienh cij lienh ndaej ndei.

(指导老师:潘桂芬)