Gou boiqfug boux vunz ndeu, de heuh Vangz Veih. De maj ndaej mbouj suenq gyaeundei, hoeng de cungj dwg naj daiq riunyumj diemzsisi, hawj vunz gamjdaengz daegbied caenciet、dwggyaez.

Vangz Veih hagsib ndei, mboujguenj dwg suyoz、dennauj roxnaeuz cozvwnz, de cungj gig youhsiu. De doiq suyoz daegbied haeujyinx. Moix ngoenz, de cawzbae sij gij cozyez lauxsae yauhgiuz sij haenx, lij gag ra govai suyoz lienhguh daeuj lienh. Gou laihnaeuz dwg bohmeh heuh de yienghneix guh, doeklaeng cij rox dwg de swhgeij gag aeu guh. De naeuz: “Guh suyoz dwg cungj yinxdaeuz ndeu, yienznaeuz baeg di, hoeng lai lienhguh doiq swhgeij miz daezsang ha.”

Geiq ndaej gou gvaq ngoenzseng ngoenzhaenx, gangj ndei gyanghaet 9 diemj cung caez bae gunghyenz guhcaemz, siengj mbouj daengz gou caj daengz banringz it diemj cung de lij caengz daeuj. Gou dwk denva hawj de. Yenzlaiz, Vangz Veih siengj youq 9 diemj cung gaxgonq guh sat 6 diuz suyoz lienhguh, siengj mbouj daengz gij daez neix miz di nanz, baez sij couh……Yienznaeuz hawj gou begbeg caj bae haet gvaiz ndeu, hoeng yawjraen de hagsib gig nyinhcaen, gou mbouj ndaej mbouj boiqfug de.

Vangz Veih sim gig ndei. Miz baez ndeu, de ciq gou di cienz ndeu, gou raen de haujlai nanz cungj mbouj boiz hawj gou, simgip le couh youq baihlaeng gangj vaihvah de, naeuz de mbouj boiz cienz hawj gou. Doeklaeng, gij vah neix cienz daengz ndaw dujrwz de lo. Gou siengj:Neix sat lo, de baezlaeng itdingh mbouj leixlangh gou lo. Caen dahraix, gvaq bae haujlai ngoenz lo, de cungj mbouj dwk denva hawj gou, gou boux ndeu youq ranz geijlai mbwq ha, siengj okbae guhcaemz youh lau nyangz de, danghnaeuz de youq baihnaj daihgya gangj gou, gou couh mboujmiz naj lo.

Sawqmwh, gou ciep daengz denva Vangz Veih, de iu gou okrog daeuj doxraen. Gou laihnaeuz de itdingh gangj gou, siengj mbouj daengz baez doxraen, de sien doiq gou gangj “doiq mbouj cienz hwnj”，lij faen ndeu mbouj noix boiz hawj gou, seizhaenx gou lwngq lo, naeuz: “Gou youq baihlaeng gangj vaihvah mwngz ne?” De gaem fwngz gou naeuz: “Gaenq gvaqbae lo, lij daez de guh gijmaz? Bae, raeuz bae guhcaemz ba!” Baezlaeng, gou caiq hix mbouj youq baihlaeng gangj vaihvah de lo, gou doiq baengzyoux hix bienq ndaej simndei hwnjdaeuj lo.

De lij miz haujlai haujlai cig ndaej gou boiqfug, soujsaenq、daihfueng、dawz bang vunz guh angq……Ciuhvunz ndaej gyau daengz cungj baengzyoux neix mbouj yungzheih, gou aeu ndeindei insik dou faenh youjyiz neix, lij aeu de guh yiengh, yiengq de hagsib.

（指导老师：覃珍团）