“三八” 快乐

（ciep geiz gonq）

Hoeng, bouxlawz cungj rox, bingzseiz “sam bet” aen swzyij neix eiqsei mbouj ndei geijlai. Couhcinj mbouj dwg naeuz boux mehmbwk neix “uk mbouj rim gyaeuj”、 “oepaj”、“vunzswnx”, eiqsei hix mbouj miz gijmaz ndei, daihgaiq hix dwg naeuz boux mehmbwk neix: Simfeuz bak- mbaeu, guhsaeh seizbienh; gag maengx gag gyaez; gag raen swhgeij ndei, dasang lai; geizgeiz gvaiqgvaiq, hihi haha; mbouj re mbouj lau, siengj lawz guh lawz; fouzsaeh nyex saeh……Doengh gij singqcaet miz di geizgvaiq neix cungj deng heuhguh “sam bet”.

Ndeindei rwixrwix, mbouj guenj gijmaz, “sam bet” aen swz neix gaenq bienq ndaej gig sizsang lo. Mehmbwk cungj heuh “sam bet”, maenh’ak heuh “sam bet”, singq seihbienh heuh “sam bet”, geizgeiz gvaiqgvaiq heuh “sam bet”, maij cawx doxgaiq、maij guhcaemz guh’angq、maij cangndang hix heuh “sam bet”, danghnaeuz mwngz cingqngamj youh maj ndaej lengj di, mbouj you mbouj couz, hihi haha, couh engq heuh “sam bet” lo ——lij heuh “sam bet laux” ne.

Gou hix deng heuh “sam bet”、“sam bet laux” ne， bouxgvan gou heuh gvaq, doihndei heuh gvaq. Naemj hwnjdaeuj, gou hix gag gamjdaengz swhgeij haemq “sam bet” ne. Mwngz yawj, youq ndaw ranz, bouxgvan gyaez, daeglwg dingq vah, doegsaw hix suenq ndaej; youq ndaw danhvei, guh hong hix ndaej swnh- fwngz, guhsaeh habsim habhoz, cienz- hong beij bouxwnq mbouj noix; bingzseiz lij seiz mbouj seiz sij di faenzcieng, dawz daeuj dox daeuq gauj riu, roxnaeuz fazbyauj canh di ngaenzgauj; lij daegbied maij guh- caemz、byaijgai, gag angq gag maengx fouzfedfed …… gijneix cungj dwg “sam bet”, nienzgeij laux di, eng heuhguh “sam bet laux” lo.

Hoeng, gou muenxeiq “sam bet”, aenvih sam bet vaiqvued. Gou ngeix, mboujguenj ndeirwix, “sam bet” cungj hawj vunz vaiqvued. Danghnaeuz miz gij bonjsaeh “sam bet”, raeuz vihmaz mbouj “sam bet” ne? “Sam bet” miz gijmaz mbouj ndei? Vihmaz itdingh aeu caemcaem cingxcingx ne? Miz maz siengj maz, siengj maz guh maz, guh maz angq maz, geijlai ndei ha. Gyoengq mehmbwk raeuz, siengj bouxgvan gyaez couh nyah de gyaez, siengj lwg maenh’ak couh sij roengz- bonj bae son; miz cienz couh yungh cienz, siengj lengj couh cangndang; miz hong couh guhhong, ndaejhoengq couh guhcaemz; baengzyoux doengz- saeh, miz gangj miz riu, seiz bienh di simsoeng di miz maz mbouj ndei ne?

Ngoenz “ciet mehmbwk” heuh “sam bet”, “sam bet” lawh mingz heuh doengzdoih. Gyoengq cejnuengx, raeuz bouxboux angq dingq angq heuh “sam bet”, swnh ngoenzciet angq bae “sam bet” ba, raeuz caez cangndang cangnaj、bae rog bae gyae、 guhcaemz guh’angq， mboujguenj dwg byaij- yamq diuqfoux、 byaij gai dajcawx, roxnaeuz dwg dangh raemx benz bya、youz suen youz doengh……Siengj guh gijmaz couh guh gijmaz, caenhcingz cuengq soeng, caenhcingz vaiqvued ba.

Soengsoeng sangjsangj leih sim- saeh,

Ndeindei deihdeih gvaq saedceij;

Ndwenngoenz yaepyet gvaq ndaej heih,

Muenxeiq “sam bet” gvaq ciuh- vunz !

Gou cingznyienh “sam bet” daengz laux, vaiqvued daengz dai.

Gyoengq cejnuengx, “sam bet” vaiqvued!（sat）