Youq gwnz hoihnaenghdamz gunghse ganbu caeuq dadui ganbu, vunzlai doiq “sam bau it ciengj” vwndiz damz ndaej mbouj noix, doiq mbanj fouqmiz, mwngz dawz gij cijbyauh baucanj gemj daemq lai ne, mbanj hoj mbouj ei; gemj daemq fukdoh iq lai ne, mbanj fouqmiz youh mbouj ciepsouh. Haemq nanz guh doh daengxbiengz, miz mbangj mbanj baenzlawz riengz de naeuz dauhleix de hix mbouj nyienh bae bau guh.

Miz duenh ndeu, swcigih geij boux lingjdauj roengzbae diucaz, ca mbouj lai cungj bungz daengz gij vwndiz neix.

Gyauz Yaujgvangh daengz Yilinz Yen Yinzdungh Gunghse fatyienh, miz song aen mbanj gaenq guh “sam bau it ciengj” lo, hoeng cungj naeuz aeu gaij baenz bau dingh yinvu gyau haeux le, mbanj lawz ndaem maz sou maz aen fuengsik neix. Gyoengqde naeuz:“Ndaw mbanj gag faenboiq, yawj ndaej raen, lumh ndaej daengz, seyenz cuengqsim, guh hong cix miz rengz.”

Anh Bingzswngh daengz Cingsih Yen Vujbingz Gunghse raen daengz, aen gunghse neix miz aen Nenloz Dadui ndeu, aenvih gak mbanj ndawde doxnyaek laeg lai, daj ndwen 6 hwnj couh gaijbaenz mbanj lawz ndaem maz sou maz lo. Yienghneix guh le, gak mbanj mbouj doxngeiz doxienq dem lo, vunzlai caez dawz rengz cuengqhaeuj baenzlawz guh ndei gij hong aenmbanj bonjfaenh bae lo. Bigvaq aen dadui vut fwz 33 moux reihnaz, mwhneix mbouj vut fwz, lij hai fwz 153 moux.

Swcigih Dangjveij Cangzveij ngeixyaeng faensik le cungj nyinh- naeuz, itdingh aeu daj sojyoujci gyangde haeuj yamq ndeu diuzcingj, cij ndaej daj goekdaej haekfug cungj cujyi baenyinz gak mbanj doxmiz haenx, haeuj yamq ndeu hawj seyenz haengjheiq camgya hong vunzlai caemhmiz haenx.

Cingq youq seizneix, Cunghgung Cunghyangh youq bi 1961 ndwen 10 ngoenz 7 hauh fat ok cijsi, aeu gak swngj、 si nyinhcaen naemj aen vwndiz aeu mbanj guh danvih haedsuenq goekgaen haenx, caemh- caiq aeu sikhaek guh sawqdiemj.

(caengz sat)

□ Hoz Saubangj sij Cinz Siengzcouh Liuz Gingliuj Cinz Siengzgen hoiz