Gwnzgai vunzlai baebae dauqdauq, miz gai miz cawx, nauhyied raixcaix. Youq gwnzgai gaicawx nauhyied neix, ceiq sawj vunz mbouj cuengqsim dwg lau gyoengq bouxlaux cawx doxgaiq deng yaeuh lo.

Miz boux buzgeq ndeu, bae gai cawx makgam. Song gaen makgam, ngamq seiq maenz cienz, buzgeq ndawsim naemj naeuz：“Cienh bw.” Couh hawj cib maenz cienz hawj boux gai makgam, boux gai makgam sou cienz roengz daeh le, youh mo aendaeh mo bae mo dauq, naeuz：“Mbouj miz cienz lingz bouj hawj mwngz, daxbuz mwngz miz haj maenz cienz lwi?” Buzgeq cix ra bae ra dauq, daj ndaw daeh ra ndaej haj maenz cienz okdaeuj ndenq hawj boux gai makgam haenx, boux gai makgam bouj maenz cienz ndeu hawj buzgeq.

Buzgeq gwn dip makgam haeuj bak bae：“Yu, caen van ha.” Couh angqfwngfwng dauqma ranz lo.

Ma daengz ranz, buzgeq couh aeu daehcienz okdaeuj suenq soq：“Aeya, noix cib maenz cienz bw.” Buzgeq siengj ndaej hwnjdaeuj lo, boux gai makgam haenx caengz doiq cib maenz cienz hawj de. Buzgeq sikhaek bae gai ra boux gai makgam, hoeng, boux gai makgam haenx gaenq sou dan baema ranz lo.

Boux gai makgam haenx canh ndaej cib maenz ngaenz, hoeng de cix vut bae le liengzsim o.