Ngoenzneix gyanghaet, daengngoenz daxgoeng loh ok aen naj riunyumj de. Gou caeuxcaeux couh hwnqdaeuj gwn cuk haeuxyangz lo. Daxdaiq dwk denva daeuj:“Feihyangz daeglan ha, dah nuengxbiuj gaenq dauqma daengz ranz daxdaiq lo, mwngz hix dauqma ranz daxdaiq ba!” Baez dingqnyi aeu bae ranz daxdaiq, gou sim’angq dwk diuq hwnjdaeuj, lienzmuengz heuh daxboh daxmeh itheij bae ranz daxdaiq.

Daeujdaengz ranz daxdaiq, dou itheij angqangq yangzyangz gwn ngaiz. Gwn ngaiz gvaq le, dou doxiu bae henz dah ra duzgyapbangx. Gou caeuq dah nuengxbiuj fwngz gaem fwngz buet gonq, daxmeh riuj aen doengjgyau byaij youq baihlaeng. Daeujdaengz henz dah, dou hid gavaq genbuh le couh roengz raemx bae ra duzgyap- bangx lo. Dou youq henzdah ra ha ra, buenq- ngoenz hix ra mbouj ndaej saek duz, sim mizdi mbwq lo. Seizneix, dangqnaj miz song boux daeggo byaij daeuj, cijraen boux daeggo ndeu dangh roengz ndaw dah daeuj, de youq ndaw boengz bumh bae bumh dauq, ya? Duz duzgyapbangx youh hung youh biz ndeu deng de log hwnjdaeuj lo. Gou boiqfug de lai lo, lienzmuengz dangh gvaqbae heuh de son. Daeggo riu dwk lwnh naeuz: “Duzgyapbangx dingzlai dwg ndoj youq ndaw gehrin, danghnaeuz duzde ndoj ndaw boengz seiz cungj dwg bak ajngab. Mwngz siujsim di couh ra ndaej raen lo.” Gou caeuq dah nuengxbiuj ciuq gij fuengfap daeggo gangj haenx bae bumh, mbouj yaephe, dou hix ra ndaej geij duzgyapbangx youh hung youh bizbwd lo.

Seizgan gvaq ndaej caen vaiq ha, daengngoenz daxgoeng yaek doek roengz bya lo, gou caeuq dah nuengxbiuj、 daxmeh hix riuj doengj duzgyapbangx rim angqvauvau dwk baema lo.

Ra duzgyapbangx caen angq ha!

（指导老师：韦彩芳）