Saw, dwg goekgaen seng- mingh, dwg doenghlig vunzloih fazcanj, de lumj gij gwn yingz- yangj, vunz cungj noix mbouj ndaej de.

Saw daiq haujlai cihsiz fungfouq hawj gou. De dwg boux lauxsae ndei gou, de lumj aen daeng neix ciuq rongh diuzroen baenaj gou.

Saw buenx gou bet bi lo, gij saw doiq gou ceiq cungyau haenx, bonj daih’it dwg swdenj. Gou bungz daengz gij cih mbouj rox roxnaeuz cih mbouj rox doeg seiz,“swdenj lauxsae”doq ndwn okdaeuj bang gou gaijgez gij gunnanz haenx. Gou ceiq gyaez boux“swdenj lauxsae” neix！

Baiz youq daihngeih dwg Siujhagseng Cozvwnz 350 Cih Dacenz. Gou baez nduj yawj bonj saw neix seiz, dwg labluenh yawj, doeklaeng dingq daxboh son le, gou cij rox baenzlawz yawj saw cij ndaej miz souhaeuj. Bonj saw neix son gou haujlai bonjsaeh, gou gyaez Siujhagseng Cozvwnz 350 Cih Dacenz bonj saw neix.

Gojgaeq Gohyozgyah baiz youq daihsam, ndaw saw neix miz haujlai gojgaeq gohyozgyah hawj vunz gamjdoengh haenx, gou yawj le raemxda lae lumj caw, gou rox moix boux vunz cwngzgungh baihlaeng cungj miz aen gojgaeq gamjdoengh vunz he. Gyoengqde cwngzgungh cungj liz mbouj ndaej saw caeuq roengzrengz, gou hix gyaez bonj saw neix.

Gou lij miz haujlai saw, gou hix gyaez gyoengqde.

Saw, dwg souj go he, sawj vunz simsangj miz rengz, coi vunz haenqrengz baenaj；saw, dwg fuk veh he, lai saek lai rongh, hawj vunz vuenyungz caemdingh. Saw, youq gou siengsim seiz, rub aen sim sieng gou, youq gou vuenheij seiz, caeuq gou faenyiengj saeh angq, youq gou cunghdung seiz, hawj gou hag rox nyaenx heiq. Dwg saw hawj gou menhmenh roxnyinh le doengh aen seiqgyaiq neix, dwg saw hawj gou hag rox baenzlawz guhvunz, dwg saw hawj gou yawj ndaej gvangq yawj ndaej gyae, hix dwg saw hawj gou cihsiz mbouj gungz. Youq gou yawj daeuj, vunz mboujduenh demlai cihsiz caeuq coengmingz, cij dwg boux vunz cingqcaen ak he.

(指导老师:莫丽珍)