Daxboh cawx seiq duz bitlwg ma hawj gou ciengx, gou sim’angq raixcaix, aenvih gou coengzlaiz mbouj ciengx doenghduz iq gvaq.

Bitlwg miz duz ndeu dwg bitndaem, sam duz dwg bithenj. Gyoengqde byaij loh hwnjdaeuj couh lumj baenz aen baenz aen giuznyoengq lingx, lij hemq bedbed, gyoengqde cungj dwg comz youq itheij.

Gou gyaez yawj bitlwg gwn doxgaiq, gig mizyinx. Aen bak bitlwg bemj lumj fag canj iq, gwn doxgaiq seiz, seiz mbouj seiz fat ok sing cik cik, bak canj mbouj dingz, baez seb ndaej doxgaiq le yaengx hoz hwnjdaeuj couh gyan roengzbae lo. Yawjraen gij yienghceij gwn gak gwn gw gyoengqde, gou siengj dungxbak bitlwg caen ndei ha! Hoeng, mizseiz gwndonq seiz, gyoengqde hix mbouj lauxsaed, doxcaenx, luenh sip, lij dawz aen buenz cang gijgwn haenx caenx boek lo.

Ciemhciemh dwk, duz bitndaem haenx maj hung di, beij sam duz bithenj ndang cangq di, ndigah gwndonq seiz ceng ndaej daegbied ak. Lumjbaenz de dang daeuz, de baez gvaqdaeuj, sam duz bithenj haenx cungj lau deuz bae henzbangx, yaengyaeng gwn. Doeklaeng, gou gag gueng duz bitndaem. Miz baez ndeu, gou youq ndaw gijgwn cuengq di faenj lwgmanh, bitndaem hai bak baez canj, gyan gaemz hung ndeu, gwn sat le, daengx lwgda, lumjbaenz rox gij gwn mbouj ityiengh, couh haenqrengz youq gwnz dieg muz aen bak swhgeij, ciep dwk youh heux aen buenz song gien, bedbed hemq, lumj naeuz: “Geizgvaiq, neix dwg gijmaz doxgaiq, geijlai manh ha! ” Gou riu naeuz: “Yawj mwngz lij ciengj mbouj ciengj!” Duz bitndaem gwn mbouj ndaej roengz lo, couh dauqcawq buet, raen raemx couh seb. Caen mizyinx, gou riu ndaej raemxda lae okdaeuj lo. Daxmeh yawjraen le, naeuz: “Siujmeiz, mwngz gaej loengh duzbit ha!” Gou cijndei caiq vuenh gijgwn daeuj.

Dingq vunz gangj nyiengh bit ndaej bit biz. Gou couh gaeb duz bitndaem daeuj, sien geuh hai aen bakbemj, de hemq bedbed, gou mbouj guenj sam caet ngeih cib it vax gaem haeuxyangz couh haenqrengz nyaenj haeuj bak bit bae, duzbit buekmingh cak, luenh bek song fwed, ndaw bak hix fat mbouj ok sing hemq lo. Daxmeh yawjraen le, doiq gou naeuz: “Aiya, mwngz aeu nyiengh dai duzbit ya!” Gangj sat couh daj ndaw bak duzbit mbon ok haeuxyangz, langh youq gwnz dieg, duz bitndaem hemq bedbed buet laj gofaex bae ndoj lo. Daxmeh gangj caj duzbit majhung le cij ndaej nyiengh gijgwn ha! Seizneix gou cij rox, ciengx bit lij aeu miz cihsiz cij ndaej.

Daj baez neix hwnj, gou mbouj caiq luenh loengh duzbit lo. Gou roengzsim ciengx duzbit, maqmuengh gyoengqde vaiqvued majhung.

（指导老师：覃珍团）