Ngoenzneix dwg ngoenz singhgiz, mbwn gig gvengq, miz geij duz roegiq youq gwnz mbwn mbin bae mbin dauq. Ndaw vuengzguek duzgoep gyoengq duzgoep cungj bae hwnjban lo, cij lw duzgoep iq youq ranz, de yaep he baenj vanzgi, yaep he youh veh doz, yienznaeuz miz haujlai vanzgi buenx de guhcaemz, hoeng de lij gamjdaengz mbwq dangqmaz. Duzgoep iq cingq nyapnyuk seiz, sawqmwh siengj ndaej aen banhfap he——bae ndaw dungzva gunghyenz guh- caemz. Duzgoep iq yied siengj yied angq, couh cung ok bakdou.

Duzgoep iq mienh byaij mienh ciengqgo, gou dwg duzgoep iq, mingzcoh heuh Gva’gva……De cingq ciengq ndaej miz yinxdaeuz, sawqmwh, de daemj deng ngauq rin ndeu, baez saemxsax, dingjlingz doek roengz aen cingj ndeu bae, seiq ga coh gwnzmbwn, duzgoep iq Gva’gva mienh nu caekhaex mienh ndwn hwnjdaeuj, caj de fatyienh cihgeij doek roengz aen cingj neix seiz, couh siengsim dwk daej hwnjdaeuj, hoeng de naemj, daej hix mbouj dwg banhfap, yiengh- neix, de swnh henz cingj benz hwnjdaeuj, hoeng benz dingz ndeu youh laemx roengzbae, hoeng de mbouj doeknaiq, baez youh baez benz hwnjdaeuj, doeklaeng lijdwg saetbaih lo, hwk dwk duzgoep cijndaej sing hung dwk swenj：“Gouqmingh ha！Gouqmingh ha！Bouxlawz daeuj gouq gou.”Dingjlingz miz duzciengh he cingq daeuj youzdin, duzciengh dingq gij singswenj, gamjdaengz gig geizheih, seiqcawq muengh bae, cij fatyienh gij singswenj dwg daj ndaw cingj cienz okdaeuj.

Duzciengh yawj roengz cingj bae, yienzlaiz dwg duzgoep doek roengz ndaw cingj bae. Duzciengh doiq duzgoep iq naeuz：“Duzgoep daegnuengx, mwngz baenzlawz doek roengz ndaw cingj bae？”Duzgoep iq Gva’gva miz lijmau dwk naeuz:“Duzciengh bohlungz, gou byaij loh seiz, daemj ndaek rin he, baez saemxsax couh doek roengz aen cingj neix daeuj lo.” Duzciengh naeuz：“O, yienzlaiz dwg yienghneix, mwngz cuengqsim, gou bang mwngz.”Gangj dwk couh dawz aen ndaeng youh raez youh hung haenx iet roengz ndaw cingj bae, heuh duzgoep gaem maenh bae, caiq baez di baez di suk hwnjdaeuj, ngamq suk daengz byongh, duzgoep iq sawqmwh youh doek roengz ndaw cingj bae, hoeng gyoengqde mbouj doeknaiq, youh caiq guh, hoeng siengj mbouj daengz duzgoep yaek daengz bak congh seiz, youh daemj rin，youh doek roengz ndaw cingj bae. Duzciengh caeuq duzgoep iq miz gingniemh le, duzciengh siujsim sisi suk aen ndaeng hwnjdaeuj, baezneix baenzgoeng lo. Duzgoep iq Gva’gva doiq duzciengh naeuz：“Docih mwngz, duzciengh boh- lungz, gij cingzngeih mwngz gou ciengxlwenx mbouj lumz.”Duz- ciengh naeuz：“Mbouj yungh ha, neix dwg gou wnggai guh law.” Daj seizhaenx hwnj，song boux de baenz baengzyoux ndei lo.

（指导老师：刘海蕙）