Miz ngoenz ndeu, Vangz daxau aeu vanj haeux ndeu daeuj gueng duzmeuz biz, doiq de naeuz: “Geij ngoenz neix gingciengz miz duznou daeuj caeg gwn haeux, mwngz aeu souj ndei, yienghneix gou moix ngoenz aeu bya hawj mwngz gwn.” Meuzbiz angq dwk naeuz:“Gou itdingh souj canghaeux ndei!”

Ngoenzneix, meuzbiz daenj hwnj gingjfuz, ndwn soh youq henz cang- haeux. Miz bang nou ndeu youh daeuj caeg haeux lo. Danhseih yawjraen meuzbiz gig vifung ndwn youq gizhaenx, cungj deuz lo. Meuzbiz ndwn youq gizhaenx, duznou couh mboujmiz banhfap yak lo. Miz duz nou he naemj ok aen geiqmouz he, de byaij daengz henz meuzbiz, itmienh ngaek gyaeuj gungj hwet, itmienh gingz aen bwnz ndeu, ndaw bwnz cang miz gij bya meuzbiz ceiq gyaez gwn haenx caeuq bingz laeuj ndeu. Lingh duz nou riunyumnyum dwk naeuz:“Meuz daeggo, mwngz sinhoj lo, di doxgaiq neix cingj mwngz sou roengzdaeuj ba!” Meuzbiz yiemzsuk dwk naeuz: “Mbouj, gou aeu bang bouxcawj gou souj ndei canghaeux, mbouj hawj gyoengqsou caeg bae.” Duznou cang guh gij yiengh gig lau haenx, cuengq aen bwnz couh deuz lo. Meuzbiz yawjyawj gij bya caeuq laeuj haenx, ndawsim siengj, gij doxgaiq ndeigwn haenx mbouj gwn beg mbouj gwn, couh baenz amq baenz amq gwn hwnjdaeuj lo. Meuzbiz gwn dwk laeuj doh lo, laemx youq gwnz dieg couh ninzndaek lo. Youq seizhaenx, bang nou ndeu daeuj lo, gyoengqde daeuj daengz henz canghaeux, yaepyet couh cang ndaej haujlai haeux lo. Gyoengqde doq baema doq angq dwk naeuz:“Duzmeuz dam gwn haenx, caen deng gyoengqraeuz yaeuh lo.”

Gvaq yaephe, Vangz daxau dauqma ranz lo, yawjraen gij haeux doek rim dieg, youh yawjraen meuzbiz cingq ninz gyaenfofo, ndatheiq dwk bongx singj meuzbiz:“Meuz dam gwn, gij haeux gvaq gizlawz bae?” Meuzbiz daj ndaw fangzhwnz singj gvaqdaeuj, ndwj da baez yawj, cij roxnyinh daengz swhgeij deng duznou yaeuh lo.

（指导老师：李学颖）