Bi’gvaq seizdoeng ngoenz he, gou cuengqhag madaengz ranz, fatyienh gwnz cuengdaiz ndaw ranz miz bat golinxvaiz he. De itdi cungj mbouj ndeiyawj, daengx ndang youh rim oen, gou bungq cungj mbouj gamj bungq de saekdi. Gou mbouj gyaez de saekdi, caen mbouj siengj caiq yawjraen de lo. Ndigah, gou buen de bae yangzdaiz cuengq.

Bi’gvaq seizdoeng caen nit, ndigah gou gig noix bae yangzdaiz, gou couh ciemhciemh lumz bat golinxvaiz haenx lo. Hoeng, ngoenzhaenx, gou bae yangzdaiz bang daxmeh aeu doxgaiq seiz, mbat ndeu couh yawjraen bat golinxvaiz haenx, gou caen doeksaetyat, mbwn baenz nit, yangzdaiz baenz gyoet, cuengq de youq gwnz yangzdaiz baenzlai nanz, de gingqyienz ndeindi’ndi, saek de lij heuloeg yubyub, itdi cungj mbouj bienq, gou gig geizheih, couh bae cam daxmeh, daxmeh naeuz: “Golinxvaiz gig ak, sengminghlig de gig giengz, youh souh ndaej nit youh souh ndaej hwngq.” Gou mbat ndeu boiqfug de hwnjdaeuj, caemhcaiq hainduj gyaez golinxvaiz lo.

Miz baez ndeu, boux baengzyoux iq ranznden baenz hangzgauqmou, daxmeh couh gvej gaiq golinxvaiz he soengq hawj ranznden, gou gig ngeizvaeg, couh cam daxmeh vih gijmaz, daxmeh naeuz, golinxvaiz ndaej yw foeg. Caen dahraix, ranznden dub golinxvaiz yungz le goemq giz in baengzyoux iq, hangzgauqmou ndei haujlai lo, caen saenzgeiz.

Daj neix hwnj, gou doiq golinxvaiz yawjfap cienz bienq lo, de dauq baenz gij va gou ceiq gyaez haenx, gou dawz de baij youq ranz gou gizdieg ceiq rongh haenx, miz de le, bineix seizdoeng couh mbouj caiq nit lo.

(seiq nienzgaep Lij Gyajgiz)