亲

Daxboh gou doenghbi youq Gvangjgungh guhhong, gou daj iq youq gwnz haw doegsaw, ndigah dou raen naj gig noix. Seizneix, gou cingq naengh youq henz daiz, itmienh dauqngeix gij saeh gaxgonq, itmienh siengjniemh daxboh. Mbouj rox daxboh seizneix muengz gijmaz ne? Daxboh seizneix dwg mbouj dwg hix siengjniemh dahlwg youq ranz ne? Daxboh, dahlwg siengj mwngz lai lo!

Moix bi yaek daengz cieng seiz, daxboh cij daj Gvangjdungh dauqma ranz. Daengx ranz vunz guhdoih naengh youq itheij gwn cieng, roxnyinh geijlai ndei ha! Youq ndaw bi raezrangrang neix, dou daengx ranz vunz cij miz seizneix ndaej ansim, vuenyungz dwk comz itheij. Gou ciengxlwenx lumz mbouj ndaej bi’gvaq haemhndaep daxboh sawqmwh dauqma seizhaenx: Aen gyaeuj bonjlaiz couh ndoq haenx bienq ndaej engq ndoq lo, byoemgyaeuj hix hainduj hau lo, yamqdin fouzrengz, moix yamq din cungj dwg yienghneix naekgywggywg. Hoeng, yawjraen dahlwg seizhaenx, yamqdin daxboh sawqmwh bienq ndaej mbaeumbimbi hwnjdaeuj lo. Gou sikhaek buet hwnjbae got daxboh ndaetndaet hwnjdaeuj. Haujlai nanz mbouj raen daxboh lo, gou aen ndaeng baez soemj, raemxda riengx lo, yaek doek roengzdaeuj lo. Daxboh lumhlumh aen gyaeuj gou, naeuz: “Bi ndeu mbouj raen, baenzlawz mbouj caengz majhung dem? Lij dwg yienghneix daemqdet baenz neix manz?” Gangj gij vah neix seiz, gij riunyumj youq cihbak daxboh haenx haujlai nanz cungj mbouj siu bae.

Itcig daeuj, daxboh cungj dwg goengqbya hung gou. Gou seiz iq miz bingh lai, daxboh ciengzciengz aemq gou bae yawj bingh. Youq naj ranz gou mbouj gyae haenx miz diuz dah ndeu, gvaqbae mbouj miz giuz, daxboh cungj dwg dawz gou cuengq gwnz mbaq bae cengj gou gvaq dah. Gou gyaeujngunh boemx youq gwnz gyaeuj daxboh ninzndaek lo. Seizhaenx aen mbaq daxboh, gawq dwg aen giuz gou, youh dwg aen mbonq raeujrub gou.

Gojnaengz dwg ndaej daxboh ndiepgyaez ba, youq ndaw lwgda daxboh, youq ndaw lwgda ranznden, gou cungj dwg dah lwgsau gig roxsoq. Moixdang lwgnyez ranzwnq bae guhsaj seiz, gou cix youq ranz bang daxmeh guhhong. Bae sou haeux seiz, haeuxfiengz daegbied raeh, gou cungj dwg mbouj siujsim couh dawz fwngz gat sieng lo. Daxmeh ciengzciengz heuh gou bae henz yietnaiq, hoeng, baez siengj daengz daxboh doenghbi youq rog dajgoeng, yawjraen daxmeh hanh lae hanh roenx, gou couh mbouj nyaenxsim yietnaiq. Ndaej caeuq vunz ranz doengz van caemh hoj, couhsuenq caiq hoj caiq baeg, gou hix sim’angq.

Bi’gonq sujgyaj, daxboh youq ranz youq. Baez cam cij rox, din daxboh foeg, in ndaej nanzsouh, guh mbouj ndaej hong, ndigah cij ndek hong ma ranz yietnaiq. Baez gaujsi sat, gou couh gipgip muengzmuengz ganj ma ranz, hoeng, mbouj lumz youq gwnz haw cawx song bingz cwnghungzvahyouz. Ma daengz ranz, gou goq mbouj ndaej din naet, couh bae yawj din daxboh, yawjraen din in daxboh youh foeg youh hoengz, raemxda gou couh daeuj lo. Daxboh lumhlumh aen gyaeuj gou, riunyumj naeuz:“Dahlwg huk gou, mbouj miz saeh ne! Vihmaz daej la?” Gou aeu bang daxboh cat yw, daxboh euq mbouj ndaej gvaq gou, lij dwg hawj gou bang de cat yw lo. Gou itmienh menhmenh bang daxboh cat din in, itmienh dauqngeix gij saeh seiziq. Seiziq gou laemx in seiz, daxboh couh dwg yienghneix cat yw hawj gou. Gwj siengj gwj siengj, raemxda gou youh riengx lo.

Daxboh dwg goengqbya hung gou, gou dwg maqmuengh daxboh. Baezlaeng, gou itdingh roengzrengz hagsib, gauj hwnj dayoz, maqmuengh miz ngoenz ndeu, daxboh ndaej gvaq ngoenzndei, ndaej ndiengqndet doiq bouxwnq naeuz: “Gou miz dah lwg gig naengzganq ndeu!” （指导老师：雷振览）