Ngoenzneix dienheiq ronghcingx. Haet- romh gou daenj diuz buhmoq gyaeundei bae hagdangz, ndawsim angq raixcaix. Hoeng gienh saeh siengj mbouj daengz haenx fatseng lo……

Haenx dwg gwnzroen bae hag, gou caeuq dahnuengx ranznden angqvauvau dwk byaij bae. Byaij gvaq bakdou ranznden seiz, mup daengz heiqhom. Ngiengx gyaeuj bae yawj, ndaw suen hai miz haujlai va. Cijraen gij hoengz lumj feiz, gij hau lumj nae, gou raen le fwngz humz, ndawsim daj cawjeiq caeg va. Mboujgvaq, yaek mbaet va lij aeu sien siengj aen geiqmaeuz. Gou yawj gonq yawj laeng, dauqdaej siengj hwnj aen geiqmaeuz daeuj. Yienghneix, gou saenzmaed dwk doiq dahnuengx ranznden naeuz:“Siujvah, mwngz gyaez va lwi?”“Gyaez!”De angqvauvau han naeuz. “Yiengh ndei, gou bae mbaet va, mwngz youq henz dawz.”“Mbouj gamj.” De lau dwk naeuz. “Lau gijma, miz gou ne! Gou hawj mwngz cangqmbei.”Caen mbouj yungzheih de cij dapwngq. Gou sien doiq de gangj gij vah “mbouj ok sing”、“yamqdin aeu mbaeu”, couh rag de yaemj din yaemj fwngz daeujdaengz henz lag suenva, gou ndonj haeuj ndaw suenva, de youq rog lag. Gou mbaet duj youh duj, ndenq hawj de. Youq gou mbaet duj gatsat seiz, bouxcawj okdaeuj lo, lij ndei, de mbouj yawj gvaqdaeuj. Gou gaenjgip ndoj haeuj muqva bae. Cij dingqnyi Siujvah hemq sing “a” siengj buetdeuz, dauq ngaiz bouxcawj laengz lo. “Ndei ha, mwngz caen damjhung, gamj mbaet gij va gou.”Bouxcawj swenj naeuz. “Mbouj……mbouj dwg gou.”Siujvah lau dwk vah hix gangj mbouj cingcuj lo. “Mbouj dwg mwngz, dwg byawz？”Bouxcawj laebdaeb saemjcam. Gou dingq daengz gizneix, rox caiq ndoj roengzbae doiq swhgeij mbouj ndei, vaiqdi daj ndaw muqva hwnjdaeuj, ndonj ok ciengz lag buekmingh buet bae hagdangz. Buet ndaej duenh roen le, gou cij nyeux gyaeuj yawj, vunz mbouj boenq gvaqdaeuj, cungjsuenq bienq yungyiemj baenz ancienz lo, gou momo hanh najbyak, cij soeng gaemz heiq ndeu. Ngaemgyaeuj baez yawj, buhmoq ngaiz gaeu sik lo. Gou sim’in dwk raemxda lae roengzdaeuj.

Haemh neix, gou madaengz ranz, Siujvah youq gyanghongh ndwn dwk, raemxda roengzyagyag, gou mbouj gvaqeiq lo, sim gou dingh mbouj ndaej roengzdaeuj. Gou yawjraen faj naj de miz riz faexcuk moeb gvaq, gawh haujlai, sim gou engq cieg lo. De naeuz gou nyi：“Bouxcawj boenq daengz ndaw ranz gou daeuj lo, swenj donq gaeuq, daxboh gou ndatheiq le, moeb gou donq he.”Gou dingqdaengz gizneix, najmong dwk raemxda lae roengzdaeuj. Siujvah cam：“Mwngz daej gijmaz ha?”Gou najhoengz rwzdit, hoj hai bak, mboujgvaq daej engq youqgaenj lo, gou najnyaenq dwk cungj mboujmiz banhfap yiengq Siujvah nyinhloek.

Diuz buhmoq neix yienznaeuz gou cij ngamq daenj gvaq baez ndeu, hoeng de hawj gou najmong, coi gou gaij ndei.

（指导老师：黄雪丽）