上林县大丰镇皇周小学二年级二班 周承厚

Ngoenzneix banngaiz, gou ninz mbouj ndaek, hoeng daxmeh youh mbouj hawj gou luenh buet, itdingh aeu ninz youq gwnz mbonq. Mbouj miz banhfap, baihrog hix mbouj miz vunz guh’angq，gou cijndei ninz gwnz mbonq.

Ninz youq gwnz mbonq, daj conghcueng muengh baihrog, cijraen gwnzmbwn miz geij duj fwjhau. Gij fwjhau gwnzmbwn, ngamq hainduj lumj duzma iq buet dwk；yaep he, raq rumz ci daeuj, dawz gyoengqde bienqbaenz duz roeglwg, lumj cingq ciengqgo nei；yaep he, gyoengqde youh comz youq giz ndeu, bienqbaenz duz lozdoz hung ndeu, lumj ngamq daj ndaw sahmoz byaij okdaeuj, cingq ngaem gyaeuj ndoet raemx；youh gvaq yaep he, lozdoz faenhai lo, lumj bienqbaenz duzgvi caeuq duzdouq doxdax nei, gou siengj：Baezneix duzdouq itdingh mbouj guh loek lo, itdingh ndaej hingz.

Gwj yawj gwj yawj, mbouj rox seizlawz, gou gaenq ninzndaek lo.

（指导老师：李文海）