德保县隆桑中心校四年级 黎彩霞

Youq ndaw hagdangz dou miz go bug youh hung youh sang ndeu.

Seizcin, gobug did mbaw heu oiq caeuq va henjhaeux homrwgrwg. Ndit ndonj gvaq geh nye mbaw mwncupcup de ciuq roengzdaeuj raeujrubrub. Dou ndaej youq laj de guh’angq.

Seizhah, nditndat lo, dou hwnj dangz dijyuz seiz, lauxsae anbaiz hawj dou youq laj gobug hozdung, rumz ci daeuj liengzsisi, sawj vunz saenzcing heiqsangj. Gij mbaw gobug seizneix youh na youh heu, ndaej bang dou cw ndit dangj raemh, hawj vunz simgyaez.

Seizcou, gwnz gobug giet miz haujlai makbug youh hung youh luenz, vunz daj baihlaj byaij gvaq, cungj siengj mbaet aeu aen ndeu roengzdaeuj buq gwn. Miz bi ndeu hai lenzvanhvei, hagdangz dawz makbug cienzbouh sou roengzdaeuj, faen hawj dou cimz, gou faen ndaej geij dip, noh youh lai youh diemz, cib faen ndeigwn.

Seizdoeng, gij mbaw gobug heuloeg haenx miz di henj lo, mbaw hix noix lo, de hawj gou gamjdaengz mizdi siliengz.

Gobug, mwngz buenx dou byaij gvaq seiqgeiq. Hawj dou youq laj mwngz guh’angq, ndoj raemh, hawj dou cimzgwn gij mak vandiemz mwngz.

Gou gyaez mwngz, gobug ndaw hagdangz.(指导老师：黎才新)