Ngoenz ndeu lajbyonghngoenz, gou youq gyanghongh caeuq gyoengq baengzyoux guh “goemqndoj”. Gou ndoj youq baihlaeng gofaex hung, maeuq roengzdaeuj ngaeu nye faex daih sing hemq: “Vaiq gvaqdaeuj ha, vaiq gvaqdaeuj ha, gou youq gizneix ne.” Siujginz dingqnyi le couh coemj gvaqdaeuj, gou lienzmuengz buetdeuz. Hoeng, ngamq ndwn hwnjdaeuj, najaek couh ngaiz nyefaex ngaeu lo, gou cungj mbouj rox baez ndwn hwnjdaeuj, “cat” sing ndeu, geu buh gou ngaiz nyefaex ngaeu ndaek congh hung lo. Diuz buh neix dwg daxboh ngamq bae gai Vujmingz cawx hawj gou, baenzlawz ndei ne?

Gou baez yamq baez yamq byaij ma ranz, ma daengz ranz, gou lau daxmeh swenj, couh dawz diuz buh duet roengzdaeuj, yo haeuj ndaw loengx bae. Danghnaeuz mbouj yo hwnjdaeuj, couh lumj baezgonq ityiengh ngaiz swenj donq ndeu.

Daengz banhaemh, daxmeh mbouj youq ranz, gou gwn haeux sat, sawqmwh dingqnyi daxbuz naeuz: “Yi, neix mbouj dwg diuz buh dah’iq ma? Baenzlawz vaih lo?” Gou baez dingq couh byaij haeuj bae doiq daxbuz naeuz: “Daxbuz, diuz buh neix dwg ngoenzneix gou guhcaemz seiz dwk vaih, daxmeh mbouj youq ranz couh mbouj daenj lo.”Daxbuz dingq le, yawjyawj diuzbuh ndaw fwngz, naeuz: “Yienghneix baenzlawz ndaej ne, diuz buh neix dwg daxboh mwngz ngamq cawx ma ndaej geij ngoenz, danghnaeuz vut bae mbouj daenj lo, caen hojsik ha, gou lij iq seiz, lienz diuz buh ndei cungj mboujmiz, caeuq seizneix doxbeij caen dwg ca lumj mbwn caeuq namh ha. Yienznaeuz seizneix swnghhoz ndei lo, hoeng cungj mbouj ndaej lumz gij gunnanz gaxgonq ha!” Gou dingq le, ngaem gyaeuj roengzdaeuj naeuz: “Yienghneix ngoenzcog gou cihgeij fong ndei.”Daxbuz laxlax gyaeuj gou, riu naeuz:“Mwngz caengz fong gvaq, baenzlawz fong ha? Lij dwg gou fong ba. ”

Naeuz guh couh guh, daxbuz couh daiq hwnj laujvahging, dawz cim hwnjdaeuj. Cijraen de gaem fagcim iq, dawz diuz buh giz vaih haenx baeb ndei, yungh lwg mehfwngz fwngz swix gaem ndaet, caiq yungh cim con gvaqbae. Baez cim baez cim con, daxbuz fong ndaej yienghaenx nyinhcaen, yienghhaenx yinz. Mbouj gvaq geij nanz, gou ninzndaek lo.

Mbouj rox seizlawz, gou singj gvaqdaeuj, cengq hai da, raen daxbuz lij saeqsim fong. Gou muengh gwnz najbyak daxbuz, gij nyaeuq de lumj cax heh ityiengh, couh lumj gij roen fwn rwed rumz bongj de byaij gvaq haenx. Doq yawj doq yawj, raemxda gou doek roengzdaeuj lo, caiq hix ninz mbouj naek lo.

raen le, sing’unq dwk doiq gou naeuz:“Mwngz baenzlawz hwnqdaeuj lo? Vaiq ninz gaej ngaiz nit lo.”Gou yawjraen, fajfwngz daxbuz deng nit dwk hoengzfwgfwg, cehda hix hoengz lo, gou yawj diuzbuh mbat ndeu, raen daxbuz yougq gwnzde seuq dujva hoengz iq he, duj vahoengz iq gwnzde lij miz aen daengngoenz hoengzndongq he, o! Aen daeng- ngoenz haenx geijlai lumj daxbuz ha, gou couh lumj dujva hoengz haenx, youq laj raeujrub daengngoenz majhung. Gou yawj fajfwngz daxbuz nitgyaengj dungcoz menh haenx, caiq hix nyaenx mbouj ndaej lo, coemj daengz ndaw rungj daxbuz bae, raemxda lumj diuz sienq ityiengh doek roengzdaeuj, gou itmienh daej itmienh doiq daxbuz naeu: “Daxbuz, mwngz……mwngz bae ninz ba, gyanghwnz lo.”Daxbuz umj gou ndaetndaet, naeuz:“Lij miz geij cim couh fong ndaej lo, mwngz sien ninz ba, gaej siengj daiq lai, ngoenzcog lij aeu bae hagdangz ne.”Gangj sat, daxbuz dawz gou umj hwnj congz, dawz denz hoemq ndei hawj gou, lij daengq gou naeuz:“Dahlan gvai gou, gaej siengj lo, vaiq ninz lo.” Gangj le daxbuz youh naengh youq gwnz daengq nyinhcaen fong hwnjdaeuj. Gou youq gwnzcongz cijraen daxbuz yaep ndeu nunu da, yaep ndeu youh nunu fwngz, mbouj rox mbouj nyinh, gou youh ninzndaek lo.

Ngoenz daihngeih, gou hwnq congz seiz, raen haemhlwenz daxbuz fong geu buh haenx venj youq gyaeuj congz gou, gou sijsaeq yawj diuz buh, aen daengngoenz hoengzndongq caeuq duj va hoengz iq gwnz buh yienj ndaej daegbied gyaeundei, caen yawj mbouj ok dwg fong gvaq, gou sikhaek daenj hwnjdaeuj, aemq daehsaw bae hagdangz.

A! Daxbuz, mwngz hawj gou naed ceh mbaet gwn mbaet yungh haenx, gou gaenq dawz de ndaem youq ndaw sim, de cingq fatngaz、 did rag……

(指导老师: 潘艳英)

Daxbuz