Vihliux ciepswnj caeuq fazcanj Dasinh Yen minzcuz ndawbiengz conzdungj minzsuz vwnzva, gyagiengz caeuq dieg seiqhenz guh minzcuz ndawbiengz yisuz baedauq nem gyaulouz, dawz gij minzcuz vwnzva ceiq miz daegsaek Dasinh Yen neix baijyienh hawj vunzlai yawj, mboengqgonq,Dasinh Yen youq yienhsingz gawjbanh Dasinh Yenzswnghdai Minzcuz Minzgenh Yisuzcez Eu Fwen Diuq Foux Doxdax Hozdung. Miz 55 boux canghfwen ndawbiengz、 22 aen doih vujdau gaenh 300 lai vunz daeuj camgya doxdax, boux eu fwen ndawde, boux nienzgeij ceiq geq miz 80 bi, boux nienzgeij ceiq saeq ngamq miz 6 bi. Gyoengq boux eu fwen haenx bouxboux cungj gikdoengh baenzmaz, eu fwen haenh saedceij ndei, haenh dangj cwngcwz ndei.Doeklaeng, bouxcanghfwen Dauzcwngz Cin eu diuz fwen《Fwen Ndei Sing Goksag 》aeu ndaej itdaengj ciengj.(Liuz Yi)